Inspiring Women Series – Dina El-Mosalami

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

Dina El Mosalami, Co-Founder & COO of Pepla.

؟Pepla أحكيلنا ليه بدأتي

أنا كبرت في أمريكا من وانا صغيرة وكنت في المجتمع اللي حواليا المسلمة العربية الوحيدة لحد ما كان عندي ١٢ سنه. من بعدها حياتي كانت متقسمه جزئين، جزء مع صحابي في المسجد وجزء تاني حياة أمريكية، مكنتش عايزة أبان اني من أصل عربي عشان كنت خايفة الناس تحس ان انا مختلفة عنهم. وفاكرة شعوري ساعتها تجاه اللبس، كنت بحس أكن اللبس الحلو معمول ليهم بس، ولبس الحجاب مكنش احلى حاجة. وكان نفسي يبقى في براند يهتم بلبس البنت المحجبة.. لحد ما نزلنا مصر وبدأنا نفكر انا واختي ازاي ممكن نطلّع براند من مصر يكون عالمي .. وبدأنا انا وفرح اختي نقسم الشغل علينا  وعملنا Pepla

 والحمد لله بقالنا ٥ سنين من ساعتها وكسبنا جايزتين واحدة في ٢٠١٩  واحدة تانية السنادي

أزاي بتنظمي وقتك بين الشغل وحياتك الشخصية والأمومة؟

الموضوع صعب بس مع تنظيم الوقت والألتزام الحمد لله بقدر اوازن بنهم. أنا يومي من الحد للخميس منظم ومنضبط جدا، بصحى الصبح اتمرن وانزل يحي أبني المدرسة بعدها قبل ما أروح المكتب بقعد ساعة لوحدي اشوف محتاجة اعمل ايه وبقعد انظم يومي، وفي وقت الشركة بيكون كل وقتي للشغل وبعد لما بخلص بقعد ساعة تانيه لوحدي اشوف اللي ناقص في اليوم متعملش وايه محتاجة اعمله بكرة. بعدها بروح البيت وأأكل يحى.. وابتدءً من ٧ او ٨ بيكون الوقت دا للعيلة والبيت وبنقطع عن العالم تماماً. ودا روتيني من الحد للخميس وأيام الجمعة والسبت اجازة بفصل فيها مع العيلة والصحاب

ريادة الأعمال بتعلمك ايه؟

بتعلمك ان النجاح ميهمكيش اوي، لما الشخص بينجح الموضوع بيكون وحش على النفسية لما تفشلي.. فا هي بتعلمك انك متفرحيش اوي بالنجاح عشان وارد جدا تخسري كل حاجة فا بتحتاجي تشتغلي على الرضا، ويكون من جواكي انه يارب هكون راضية عن النجاح والخسارة.. ودا صعب جدا.. انا لسه بجتهد اني اعلم نفسي لما اشوف لPepla

نجاح اضبط نفسي وافتكر ان ربنا لو مأردش النجاح يكمل هفضل راضية 

؟ “my brand is my baby” ايه رائيك في جملة

عمري ما بقول الكلمة دي ولا بحبها. انا اولادي هما اولادي وشغلي هو شغلي. التجارة فيها مكسب وخسارة وانتي لازم تدخلي my brand is my baby بالفكر دا، مفيش حاجة اسمها 

 عيلتي ليهم قدر من الحب في قلبي ميتقارنش بحاجة تانيه. ومش صحي ان الشغل ياخد مكان العيلة، دا مش صح لأي حد سواء راجل او ست. ودي حاجة بتعلمها مع الوقت، اني احط الشغل في خانه معينه واقفل عليها

لو هتنصحي حد لسه بيببدأ مشروع هتقوليله ايه؟

أنا اتعلمت ان اللي بيفرق إنسان عن التاني هو الانضباط. ودا ممكن تقيسيه في الشغل والدين والجواز واي حاجة في الحياة. قدرتك على انك تعملي شيء مش عايزة تعمليه هو اللي بيحدد الشخص هيكون ناجح ولا لأ. في الشغل مثلا ممكن تدبسي نفسك في حاجة وتبقى مضطرة تعمليها بس لأن عندك التزام هتعمليها.. ممكن تكوني مش قادرة تقومي تصلي بس لازم تقوّمي نفسك، وفي الجواز كتير الإنسان لازم يتعلم يضغط على نفسه عشان الدنيا تمشي. فا الشخص اللي بيعرف يكلم نفسه بعقله وياخد قرار هو عارف انه صح ويعمله حتى لو مش قادر، هو دا الشخص اللي بينجح واللي بيفرق عن شخص تاني واقف مكانه

في جملة بحبها جدا وعايشة بيها بتقول 

“If you’re the smartest person in the room, you are in the wrong room”

الشخص بيحتاج يحاوط نفسه بناس أعلى منه عشان يوصل لمكان أحسن، يحاوط نفسه بمعلمين، بناس نجحوا نجاحات كبيرة وتتعلم منهم. أنا كان نفسي أقابل مثلا محمود العربي الله يرحمه. كان لما يحصله ضائقة مادية يعين ناس أكتر عشان يفتح بيوت ناس اكتر، وكان بيقول ان ربنا كان بيكرمه من حيث لا يحتسب في كل مرة بيعمل فيها كده. فا شخص زيه ملهم بنسبالي جدا على المستوى الشخصي مش بس العملي. عشان أنك تعملي فلوس مش حاجة مهمه.. لكن السؤال هو “بتنجي ازاي؟” هل بتتمسكي بمبدأك ومعتقداتك ولا بتعملي أي حاجة حتى لو عكسهم عشان تنجحي.. دي نقطة مهمة جدا

ليه مش بتشاركي حياتك على السوشيال ميديا؟

خسارة كبيرة اوي في زماننا ان حياتنا كلها بقت على المكشوف كدا.. أنا ضد الموضوع دا عشان حاسة اني لو فتحت حياتي على سوشيال ميديا هكون بفسد حياتي. بحس اني مش هعيش استمتع بالنعم اللي ربنا ادهالي لو في كل لحظة مع ابني او اهلي قعدت اصورها وانزلها.. اللحظات دي المفروض تتعاش مش اصورها واشاركها مع الناس. فا انا مش بنزل غير المحتوي اللي ليه علاقة بالشغل، ولو داه هيقلل من نجاحي انا راضيه ب دا 

ايه الفرق بين الحياة في أمريكا والحياة في مصر؟

الحياة في أمريكا ممكن تكون أريح، بس الحياة في مصر أجمل كتير.. وبجد المصريين ألذ شعب في العالم، وفعلاً أطيب ناس في التعامل. هنا أي حد مستعد أنه يساعدك ويعلمك ويقف جمبك ودا حقيقي مش في شعوب كتير، احنا بنعمل نكت كتير على نفسنا.. ومش بنذكر المحاسن بس فعلاً المصريين أجمل شعب، ودي حاجة كل رائد أعمال محتاج يستغلها.. يخبط على أبواب ناس مختلفة وهيلاقي ناس كتير اوي مستعدين يساعدوا بس هو ياخد الخطوة

“علاقتك بربنا أستثمار في روحك”

لو هتدي نصيحة لبنت لسه متحجبه جديد، هتقوليلها ايه؟

أنا مش هديها نصيحة على قد ما أنا هحكلها تجربتي أنا. أنا ربنا كرمني جدا في حياتي في شغلي او حاجات تانيه.. وساعات بتسائل يارب اشمعنى انا؟ انا شخص عادي اوي في حاجات كتير في الدين.. وبقعد أفكر ليه ممكن ربنا يكون عمل معايا كدة.. ومش بلاقي غير حاجة واحده انا جاهدت نفسي فيها كل عمري.. هو جهاد نفسي اني ابقى محجبة.. قصة اني مسلمة في أمريكا وقصة حجابي في مصر كانت صعبة جدا كل الناس في مصر كانوا دايما يقولولي “هو ربنا هيدخل الجنة عشان طرحة دي حتة قماش”.. وممكن يكون نيتهم خير..

بس الحجاب التزام. هو أولوية بيترتب عليها باقي اولوياتك في الحياة، انتي بتبصي على نفسك في المراية وعارفه انك أجمل بكتير منغيره، بس بتقرري أنك تلمي شعرك وتخبي جمالك دا طمعانة في رضا ربنا. هي دي أكتر حاجة كان فيها تحدي في حياتي وانا طفلة. واحساسي في رحلتي الشخصية ان ربنا حب يعرفني ان لما بختار طريقة بكون بعمل استثمار “ولسوف يعطيك ربك فترضي” ربنا كرمني عشان مسبتش الطريق وحاولت اتعلق بيه. فا انا هقولها لما الدنيا تكون صعبة في الحجاب افتكري ان ربنا هيعوضك ويكرمك في الدنيا مش بس في الآخره