Inspiring Women Series

Heba El Sawah – Inspiring Woman Series

Posted on 26 September, 202126 September, 2021 by Lobna El Maraghy

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

باحثة وكاتبة ولايف كوتش متخصصة في مجال العلاقات الأسرية وتحقيق الذات. هبة معروفة بدورتها التدريبية الخاصة بالعلاقات الزوجية. تقوم أيضا بجلسات إستشارية لمساعدة الأفراد والأسر ولها العديد من الإسهامات في عالم التدريب والإعلام

بدأتي ازاي في مجال التدريب؟

أنا درست إدارة أعمال واتخصصت في تسويق و اللي خلاني أبدا في المجال دا هو اني لما خلفت كنت عايزة اعرف ازاي نربي صح عشان الطفل يطلع سوي، فا بدأت اقرأ في مجال التربية، ولما لقيت اني مستفيده جدا من الكلام بدأت ادور ازاي اكون مدربة معتمدة عشان اشرح الكلام دا لحد تاني فا بقيت معتمدة اني اكون مدربة تربية إيجابية للأباء من مؤسسة الأنضباط الإيجابي. ولما بدأت أدي دورات تربية بدأ يجيلي اسئلة ليها علاقة بالجواز، فا بدأت أدرس في العلاقات واخدت شهادات ودورات مع كذا مكان ومؤسسة جوا وبرا مصر منهم معهد جوتمان، وسافرت أمريكا درست بشكل احترافي اكتر تدريب معتمد مع جون جراي صاحب مؤسسة المريخ والزهرة وبقيت مدربة علاقات

^{_{العلاقات عاملة زي اي شركة في الدنيا، حتي لو بدأت كويسة جدا وعلي ارض صلبة، عدم صيانتها هيخلي الشركة دي تقع مهما كانت ناجحة في الاول}}

ايه أكبر أخطاء بتتعمل في العلاقات؟

أكبر الأخطاء هي اننا بنضمن العلاقة وبنبطل نبذل مجهود فيها وبنهملها. الناس بتكون متخيلة انهم داخلين العلاقة وبنهم الحب والتفاهم وعلاقتهم كويسة ببعض فا خلاص مش بيبذلوا مجهود انهم يحافظوا علي دا. بيكون عندهم تخيل انهم هيكملوا بقوة الدفع الأولي. والعلاقات عاملة زي اي شركة في الدنيا، عشان كده اسمه “شريك حياة”، الشركة حتي لو بدأت كويسة جدا و علي ارض صلبة، عدم صيانتها وإدارتها بطريقة كويسة، ويكون علي طول في محاولة للتحسين منها، هيخلي الشركة دي تقع مهما كانت ناجحة في الاول

فا أكبر غلط بنعملة هو اننا مش بنعمل الصيانة دي، بنسبها شغالة لوحدها كده وخلاص بعد كده بندرك اننا محتاجين نعمل حاجة لما بتكون المشاكل كبرت اوي . فا اكبر غلط اننا مش بنتعلم العلاقات بتقوم علي ايه وايه اللي احنا محتاجين نعمله عشان تستمر، بنبقي متخيلين انها هتمشي كده فا لما مش بنلاقي النتيجة اللي احنا عايزنها بنضايق

^{_{أنت ليك قيمة، والقيمة دي مش مشروطة بأي شئ، القيمة دي عشان انت بني ادم ربنا خلقه ونفخ فيه من روحه}}

ازاي الواحد يتعلم إنه يقدر نفسه وقيمته؟

أول حاجة، محتاجين يكون عندنا القناعة دي، ان ربنا طلاما خلقني في الدنيا و انا عارفة ان هو حكيم، فا إذاً اكيد في حكمة في الدنيا وربنا اكيد خلقني لسبب حتي لو انا لسه مش عارفة ايه السبب دا. انا اكيد ليا دور وليا قيمة، وقيمتي دي مش مشروطة ب انا بشتغل ايه او بعمل ايه، لا هي جاية من كون ان ربنا نفخ فيا من روحه وخلقني بني ادم مكرم

تاني حاجة، ان تبتدي تعاملاتي مع نفسي تعكس القناعة دي، بمعني اني ابدأ اتعامل مع نفسي زي ما بتعامل مع حد انا بحبه، سواء صحابي، شريك حياتي او ولادي، حد انا مش عايزة اخسره. فا الحد اللي انا بحبه دا بتكلم معاه بطريقة فيها احترام حتي لو انا بزعل منه بيكون بطريقة كويسة ولو ضايقته بعتذرله ولو عمل حاجة حلوة بقدرها ولو بيمر بظروف صعبه بدعمه، لو حد ضايقة بديله كلام ايجابي. فا نفسي تستحق مني اني اعاملها بنفس الطريقة، لأن مينفعش اتوقع من الناس الي حواليا انهم يعاملوني كويس ويحترموني وانا اصلا نظرتي لنفسي ومعاملتي مع نفسي فيها مشكلة. لازم اتعامل مع نفسي بلغة احترام وحب وتقدير مش بلغة جلد ونقد

تالت حاجة، بعد ماكون شفت نفسي اني بني ادم ليا قيمة والقيمة دي مش مشروطة، القيمة دي في كوني بني ادم ربنا خلقة، وابتديت اتكلم معاها بلغه حب، ابتدي اشوف نفسي دي انا عايزه اطورها في ايه واعلمها ايه، وتتخطي العيوب اللي عندها ازاي، بس يكون دا مبني علي احساس اني بحبها مش اني بكرهها وعايزها تكون حاجة تانية عشان احبها.. وبتكلم عن الموضوع دا باستفاضه اكتر في

Glow (Self Esteem) Course

نتصرف ازاي لو حصل تغيير جذري في حياتنا؟

التغيير هو الحاجة الثابتة الوحيدة في الحياة، واكتر حاجة موجودة في حياتنا، والتغيير متوقع. يعني علي قد ما كل واحد التغيير ممكن يجيله من حته مختلفة بس الدورة بتاعت التغيير واحدة في المراحل اللي البني ادم بيعدي بيها. فا محتاجة اول حاجة اتعلم ايه المراحل دي وبتمشي ازاي وايه ترتبها، علشان دا هيكون كأنه بيديني خريطة اقدر استخدمها، والخريطة دي بتطمني زي اكني وانا رايح مكان عمري ما روحته قبل كده. بتحسسني انه تمام طبيعي الطريق دا يكون عامل، هكون عالأقل عارفه المكان. التغيير بيبدأ بالحدث اللي حصل والتغيير الجذري دا ممكن يكون واحده اطلقت او واحد هاجر او اي حاجة كبيرة وجديدة علينا

أول مرحلة بتبدأ ان الانسان بيحس انه متلخبط ومشتت جدا، وجزء فيه بيموت بكل المشاعر المؤلمة اللي مع الحدث، وجزء تاني تايه ومش عارف يعمل ايه. وبعد شويه بيبدأ الانسان يجيله أمل ان النفق المظلم دا هيجيله يوم ويخلص، واول مرحلة دي طبعا بتاخد وقتها

تاني مرحلة الامل بيبدأ يزيد لحد ما البني ادم بيحس انه مش بالحزن واللخبطة اللي كان فيها، فا يبدأ يحس انه في حاجات عايز يعملها في حياته، فا يبدأ يفكر في الحاجات الجديدة دي ويحولها الي خطه وهدف

^{_{لما الانسان بيكون متقبل ان كل حاجة بتعدي حتي الألم، ساعتها هيبطل يقاوم التغيير ويتعلم ازاي يتعامل معاه}}

بعدين يدخل علي تالت مرحلة، انه ياخد الخطة دي وينفذها ويصطدم بالحياة الواقعية اللي ساعات كتير بتكون عكس توقعتنا، ويفضل يقع ويقوم لحد ما الخطة تبتدي تشتغل

.وبعد كده رابع مرحلة واللي بيبدأ يجني فيها ثمار الرحلة المرهقة دي. فا دي تقريبا المراحل الي بنمر بيها ايا كان التغيير الي حصلنا ولكن هيساعدنا اننا نتعلم المراحل دي اننا نرفع شعار ان اي حاجة في الحياة بتعدي، الحاجات الحلوة والوحشة بتعدي فا هي دي الحياة، ربنا سبحانة وتعاله من سنته في الكون التغيير، “يولج الليل في النهار ويولج النهار في الليل (سورة فاطر)”، “ويخرج الحي من الميت ويخرج الميت من الحي (سورة الروم)”، فا سنة الكون هي التغيير، ولما الانسان بيكون متقبل ومتصالح مع ان دا طبيعي في الحياة ومتصالح ان كل حاجة بتعدي حتي الفترات المؤلمة، ساعتها هيبطل يقاوم التغيير ويتعلم ازاي يتعامل معاه.. و بتكلم اكتر عن الموضوع دا في

Game Changers Course

ازاي نحافظ علي قلبنا يفضل سليم مع كل صعوبات الحياة؟

اولاً مهم اوي ان يكون عندنا وجهة في حياتنا، كل مايكون عندنا هدف مشغولين بيه كل ما بقي في احتماليه اقل ان القلب يتشتت بالصعوبات الكتير اللي موجودة في حياته وتخطفه من هنا لهنا. انا عندي هدف فا عندي بوصله وعندي غاية كبيرة مهمة اوي بالنسبالي انا بشتغل عليها

وتاني حاجة اننا نتقبل ان الحياة مش مثالية ولا احنا مثاليين ولا الناس حتي، فا دا هيخلي القلق الي بنحس بيه اقل شويه واحنا بنواجهه صعوبات الحياة، او لما نغلط احنا شخصياً او لما نشوف حد بيغلط. لأننا هنكون فاهمين اننا قاعدين في الدنيا مش قاعدين في الجنة فا الطبيعي ان يحصل صعوبات ويحصل التغييرات ويكون في ناس بتضايقنا وان احنا نفسنا نكون بنغلط وهكذا. فا نظبط توقعتنا عن نفسنا وعن الناس

رقم ثلاثة، اننا نفضي اللي جوانا اول بأول، عن طريق طرق كتير للتشافي الانسان ممكن يعملها، وعلي رأسها اننا نتكلم مع طبيب نفسي او مدرب او حتي حد من صحابنا، اهم حاجة نكون بنخرج الي جوا عشان ميفضلش يتكوم جوانا ويعمل حاجز كبير في حياتنا حتي لو معندناش تحكم ان الصعوبات اللي في الحياة دي دلوقتي تتغير، حتي لو الشخص اللي ضايقنا مثلا مش موجود خلاص في حياتنا اصلا بس بنفضي اللي جوانا عشان نخفف الحمولة اللي في قلبنا عشان يفضل سليم وبفطرته

ورابع حاجة هو اننا نفكر نفسنا بالامتنان لنعم ربنا الكتيرة لان ساعات كتير لما بنمر بصعوبات دماغنا مش بتشوف غير الصعوبات دي وبننسا اننا في نعم كتير موجودة حتي مع الصعوبات. ونسأل دايما ربنا عايز مني ايه في الموقف دا، يا تري ربنا عايز يعلمني ايه، او ايه ربنا شايلهولي لان ربنا كل حاجة بيعملها لخير، رب الخير لا يأتي الا بالخير

ورقم خمسة، ان الانسان يفضل يحاول يكون متوازن لان روحك ليها احتياجات فا تديهالها عشان تفضل سليمة ويكون عندك صحة نفسية مظبوطة

ازاي نتفادي اننا نعيش في دور الضحيه؟

الاول محتاجين نفهم هو دور الضحية الناس بتعيش فيه ليه.. اولا ساعات بيكون عشان احنا متربيين اننا مينفعش نغلط، فا بالتالي ناس كتير لما بتغلط او الحياة بتبوظ منهم لاي سبب اول حاجة بيفكروا فيها، هرمي المشكلة دي علي مين؟ لأني اتربيت غصب عني اني مينفعش اغلط واني لو غلط فا انا كده مش كفئ، او ان انا مش كويس، فا هيفكر انا كده مش كويس دا بسبب حاجة تانية

وساعات بنعيش في دور الضحية عشان نلفت الانتباه.. دا لان الشخص بيكون عنده مشكلة في نظرته لنفسه، لانه شايف انه مش كويس كفاية،ولا يستحق الحب والتقدير. فا بيبدأ بشكل غير واعي انه يدخل في دور الضحيه عشان ياخد الانتباه او الناس تاخد بالها منه وتهتم بيه عشان يحس انه محبوب ومهم. ودا احتياج فطري عند كل انسان انه يحس بحب من الناس الي حواليه ف،ا لو هو مش عارف ياخد دا بشكل صحي وعنده مشكلة في نظرته لنفسه، هيحاول ياخد دا حتي لو بشكل غير صحي وهو ان كل الوقت يكون بيشتكي

ايا كانت الأسباب، احنا محتاجين نعرف كذا حاجة، منهم ان اكتر شخص بيتأذي فيه هو الشخص اللي بيلعبه. لأن هو في الاخر هيشتكي وهيقول ان انا مظلوم، فا الناس هتتعاطف معاه شوية بس هيجي وقت وهيزهقوا، حتي لو مزهقوش هما هيكونوا مكملين في حياتهم. الشخص هو اللي هيكون قاعد في الحتة دي ومحبوس في الحزن والغضب اللي جواه ومش بيعمل حاجة. وساعات الغضب دا بيقلب بعد شوية بنفسنه، ويدخل في مستنقع الضحية اللي باصه للناس اللي حواليها وبتقارن نفسها وتقعد تقول ليه يارب عملتلي انا كده ومعملتش فيهم هما كده.. اشمعني هما كويسيين ومكمليين وانا الوحيد اللي واقف هنا

^{_{التشافي مسؤوليتي انا مهما كانت التجربة مؤلمة، انا قادر اني مخليش حياتي محكومة بالموقف اللي حصل دا، انا اكبر بكتير من اني الخص حياتي في حدث واحد}}

فا محتاجين نعرف ان الطريقة دي بتأذي الشخص نفسة أكتر واحد. وتاني حاجة انك تعرف ان ربنا خلقنا بني ادمين مسؤولين، وخلق في فطرتنا القدرة علي انه لما يحصلنا مشكلة نتعلم من المشكلة ونكمل حياتنا. فا لو انت فضلت محبوس في الغضب و في اللي حصل، فا انت بتبعد عن الفطرة دي وبتعطل نفسك، ايا كان اللي حصلك دا فا خلاص هو حصل.. مسؤولية ايه اللي هيحصل بعد الابتلاء والتعطيل اللي انا فيه، دي مسؤوليتي انا، لأنه لو حد جه عور حد والشخص بينزف، مينفعش اجي اقول هو اللي مسؤول، لأني لو فضلت مستني الشخص اللي اذاني هو اللي يعالجني، انا ممكن افضل انزف لحد ما اموت.. التشافي مسؤوليتي أنا.. انا قادر اني مخليش حياتي محكومة بالموقف اللي حصل دا

فبالتالي عشان الشخص يطلع من دور الضحية، هو محتاج يطلع كل الغضب والطاقة السلبية اللي جواه مع حد يكون متخصص او حتي حد من صحابي، او في ورقة وقلم

بعد كده هبدأ افكر في حاجتين مهمين، اني عايز اسامح الظرف اللي حصل دا، لو عندك قدرة تسامح الشخص اللي عمل كده يكون كويس بس لو مش عندك يبقي علي الاقل تسامح الموقف اللي حصل. يعني أقول، انا راضي بقضاء ربنا حتي لو هاخد حقي من الشخص دا يوم القيامة، لأن انا يقيني في ربنا انه مش هيقدر عليا حاجة غير وهي خير ليا

فا اتسامح مع التجربة نفسها بعد كده ابدأ اشيل المسؤولية بتاعت اللي جاي، واقول لنفسي: دا اللي حصل وانا اكبر بكتير من اني ألخص حياتي في الموقف دا

Lobna El Maraghy

Devoted to books and notebooks. I have a passion for scribbling down my thoughts on blank pages. A firm believer in the power of words. Always aspiring to inspire others.

Hijabi model wearing flowing EMMA scarf Starry Night inspired by Van gogh

A Better Version Of Myself

6th year in my hijab. Hijab builds me, it protects me. Flash back, 6 years ago… I was afraid of [...]

6 Comments

20
Oct

Nesma Khedr’s Hijab Story

❤ الحمد لله الذى بنعمته تتم الصالحات …. قلعته بعد ١٦ سنه حجاب و لبسته تانى بعد ٨ شهور [...]

35 Comments

29
Sep

the sunrise with the words allah everthing in the middle

Greater Than All

As these very special 10 days of Dhul Hijja unfold, I’m intrigued to explore more of their hidden gifts sent [...]

11 Comments

01
Aug

27 thoughts on “Heba El Sawah – Inspiring Woman Series”

Noran fouay says:
اننا نتقبل ان الحياه مش مثالية ولا احنا مثاليين ولا الناس حتي
Really all the words touched my heart I really loved it ❤️

26 September, 2021 at 1:28 pm
Reply
Aya Khaled says:
بعيداً عن إن المقال كله بالنسبة لي كان زي رسالة من ربنا ورد على ظلم بمر بيه
إلا إن اكثر جزء اثر فيا هو إن ازاي لازم اتخطى الزعل والغضب والحسرة وابدأ احب الموقف قدر المتاح مع التصالح مع التوابع اياً كانت
رغم اني عارفة إن ربنا لو لم يعينني على دفع هذا البلاء انا هعيش بغصة في قلبي ناحية الموضوع ده ورغم اني دائماً بروج لفكرة مسامحة اي شخص اذاني او اذى غيري لإني كان بيعز عليا فكرة إن حد يدخل النار بسبب زعلي منه، لكن حقيقي الموقف ده موجع ظالم وحقيقي المتسببين يستاهلوا

بس حاضر دكتور هبة كلامها صح الغضب لفترة طويلة مش هيضر ولا يعطل حد غيري
شكراً على مقال في وقته باليوم والساعة بالنسبة لي

26 September, 2021 at 1:29 pm
Reply
Amany salama says:
لازم نفكر نفسنا بالامتنان لنعم ربنا الكتيرة لان ساعات كتير لما بنمر بصعوبات دماغنا مش بتشوف غير الصعوبات دي وبننسا اننا في نعم كتير موجودة حتي مع الصعوبات. ونسأل دايما ربنا عايز مني ايه في الموقف دا، يا تري ربنا عايز يعلمني ايه ♥️

26 September, 2021 at 1:30 pm
Reply
Nour Ahmed says:
Reading this was so thoughtful and inspiring and just in time for me as I am going through a lot of changes now ❤️ Looking forward to learning more about your courses. Thank you for the beautiful tips ❤️

26 September, 2021 at 1:31 pm
Reply
Amany salama says:
العلاقات عاملة زي أي شركة في الدنيا، حتي لو بدأت كويسة جدا وعلي ارض صلبة، عدم صيانتها هيخلي الشركة دي تقع مهما كانت ناجحة في الاول

26 September, 2021 at 1:31 pm
Reply
Aya Maher says:
Inspiring ❤️

26 September, 2021 at 1:40 pm
Reply
Hagar Ossama says:
عشان كده اسمه “شريك حياة”، الشركة حتي لو بدأت كويسة جدا و علي ارض صلبة، عدم صيانتها وإدارتها بطريقة كويسة، ويكون علي طول في محاولة للتحسين منها، هيخلي الشركة دي تقع مهما كانت ناجحة في الاول
Couldn’t agree more, we need to continually work on our relationship with others in order to make it grow and never take it for granted ♥️♥️♥️♥️

26 September, 2021 at 1:41 pm
Reply
yaraahmed350 says:
So inspiring i really love it??

26 September, 2021 at 1:43 pm
Reply
nehad Nabil says:
اننا نفكر نفسنا بالامتنان لنعم ربنا الكتيرة لان ساعات كتير لما بنمر بصعوبات دماغنا مش بتشوف غير الصعوبات دي وبننسا اننا في نعم كتير موجودة حتي مع الصعوبات. ونسأل دايما ربنا عايز مني ايه في الموقف دا، يا تري ربنا عايز يعلمني ايه، او ايه ربنا شايلهولي لان ربنا كل ,حاجة بيعملها لخير، رب الخير لا يأتي الا بالخير

26 September, 2021 at 2:32 pm
Reply
Eman says:
أنت ليك قيمة، والقيمة دي مش مشروطة بأي شئ، القيمة دي عشان انت بني ادم ربنا خلقه ونفخ فيه من روحه

Well said ♥️

26 September, 2021 at 2:42 pm
Reply
Noha says:
بغض النظر اني حسا اني عايزه اقوم اسقف بجد للمقال الجميل دا مؤثر بشكل كبير جدا جدا
واستفدت منه ماشاء الله عليها المقال كله رسائل جميله تلمس قلب اي حد واكثر الاجزاء المؤثره فيا “هو إن الانسان بيكون متقبل ان كل حاجة بتعدي حتي الألم ساعتها هيبطل يقاوم التغيير ويتعلم ازاي يتعامل معاه بجد فعلا ربنا بيدي كل واحد شيله وربنا عارف ان الشخص دا قدها الحمد لله لازم نفتكر ان كل حاجه هتعدي حقيقي الفكره اننا نتعامل ازاي معاها لحد ما تعدي وترجع الدنيا كويسه
وكمان لما الدكتوره هبه قالت “التشافي مسؤوليتي انا مهما كانت التجربة مؤلمة انا قادر اني مخليش حياتي محكومة بالموقف اللي حصل دا انا اكبر بكتير من اني الخص حياتي في حدث واحد صح جدا لان الزعل لفترة طويلة مش هيضر ولا يعطل حد غيري الحياه كلها تجارب سواء سلبيه او ايجابيه لازم نعدييهم ونشكر ربنا ع كل التجارب لان مفيش تجربه بنعديها الا وربنا ليه حكمه في كده لان الحياه مش مثاليه ولا احنا مثالين ولا الناس مثاليه الدنيا دار اختبار وابتلاء
علاقتنا ف الحياه عامه عاملة زي أي شركة في الدنيا حتي لو بدأت كويسة جدا وعلي ارض صلبة عدم صيانتها هيخلي الشركة دي تقع مهما كانت ناجحة في الاول لازم نحط القاعده دي ف حياتنا وف بالنا دايما علاقتنا بكل حاجه هتكون مريحه جدا
بشكر دكتوره هبه ع المقال الاكتر من رائع وعلي خبراتك المذهله استفدنا كتير حقيقي لمستي قلوبنا بكل كلمه
وشكرا لايما حقيقي مش مجرد براند سكارف قمر وستايلينج جميل لأ دا عيلتنا التانيه الي بتفيدينا بكل حاجه في الحياه ❤❤

26 September, 2021 at 3:00 pm
Reply
Nevo mazzika says:
I will do my best while also remembering my worth is not attached to what i accomplish ?

26 September, 2021 at 5:02 pm
Reply
AyaAhmed says:
بالنسبالى اهم حاجة قالتها د هبة ان الانسان لازم يقدّر نفسه و يحبها و يعاملها زى ما بيعامل اى حد مش عايز يخسره للاسف اوقات كتير الواحد بينتقد نفسه بشده و جلد الذات ده بيقلل من نظرة الانسان لنفسه و ده بيخليه منطوى و كاره للحياة و للاسف بيبدأ ده يأثر على علاقته بكل حاجة حواليه لانه مش قادر يسامح نفسه ف ازاى هيسامح اى حد او هيرضى باى حاجة بتحصله… لازم كلنا نهون على نفسنا و نعرف ان كلنا بنغلط و نسامح و نغفر لنفسنا عشان نقدر نحب نفسنا و نقدرها وبالتالى نحب كل حاجة فى حياتنا و نكون بنعامل كل الناس اللى ف حياتنا ب لين و لطف
زى ما قال رسول الله صلى الله عليه و سلم” الا اخبركم بمن يحرم على النار و بمن تحرم النار عليه؟ على كل هين لين سهل قريب” صدق رسول الله

26 September, 2021 at 5:47 pm
Reply
مريم أبو المعاطي says:
التشافي مسؤوليتي انا مهما كانت التجربة مؤلمة، انا قادر اني مخليش حياتي محكومة بالموقف اللي حصل دا، انا اكبر بكتير من اني الخص حياتي في حدث

“الحقيقة أنا من قراء ومتابعين هبة من زمان جدًا جدًا، والمقال كله بالنسبة لي فيه رسايل لطيفة جدًا وأكتر من كوت لمسني، لكن دا تحديدًا شيء أنا بعايشه في الفترة دي من حياتي وأنا بحاول اتخطى حاجة معينة بنفسي

انا فاكرة اني اول يومين من الحدث دا قعدت متنحة ومش فاهمة حاجة أصلا، وأنا بمر بفترة تعتبر كريتيكال مينفعش اضيعها متنحة عشان الندم بعدها هيكون مضعاف
وقتها قولت لنفسي جملة شبه اوي إن التشافي مسئوليتي
اتجرحنا يا مريم؟ مش مهم .. يلا نخف بسرعة كدا
وهقول جملة بقولها لنفسي كتير اوي
“طعم الشفاء بالتجاوز”
فـ يارب كل الناس تتجاوز اي شيء موقفها.

26 September, 2021 at 7:25 pm
Reply
Sarah says:
رقم ثلاثة، اننا نفضي اللي جوانا اول بأول، عن طريق طرق كتير للتشافي الانسان ممكن يعملها، وعلي رأسها اننا نتكلم مع طبيب نفسي او مدرب او حتي حد من صحابنا، اهم حاجة نكون بنخرج الي جوا عشان ميفضلش يتكوم جوانا ويعمل حاجز كبير في حياتنا حتي لو معندناش تحكم ان الصعوبات اللي في الحياة دي دلوقتي تتغير، حتي لو الشخص اللي ضايقنا مثلا مش موجود خلاص في حياتنا اصلا بس بنفضي اللي جوانا عشان نخفف الحمولة اللي في قلبنا عشان يفضل سليم وبفطرته
This touched me the most. I believe life would me much better if u opened up whenever we felt the need to vent.
Bad/Negative feelings build up, cumulative bad feeling ruin relationships and ruins lives.
Keep our hearts open to love ❤️ would make the greatest difference.

26 September, 2021 at 8:03 pm
Reply
Manar Mohamed says:
ابدأ اتعامل مع نفسي زي ما بتعامل مع حد انا بحبه، سواء صحابي، شريك حياتي او ولادي، حد انا مش عايزة اخسره
?

26 September, 2021 at 8:38 pm
Reply
Noura says:
كيف استخلص نقاط القوى والنقاط الضعف من كل تجرب وماهي اساليب المعالجة والتعزيز

26 September, 2021 at 9:39 pm
Reply
Farah says:
1. I have read about self- love and choosing yourself first and all that but This allowed me to look at it from a different perspective when she said “treat yourself like how u treat people you love” and it got me thinking about how I treat others and how I can be so harsh on myself sometimes. That made me realize that I deserve this love too just as much as my loved ones deserve it.

2. The reminder that if a person did us wrong in the past ( a toxic friend for example) , i must move on from that and try not to play the victim, because the only person I am harming is me so instead I thank god because these experiences taught me a lesson I will never forget. And lastly it’s important to get out all the negative emotions u have for this experience by speaking to someone.

26 September, 2021 at 11:16 pm
Reply
Amina alaa says:
لازم اتعامل مع نفسي بلغة احترام وحب وتقدير” مش بلغة جلد ونقد ”
من اكتر الحاجات الأنا مقتنعه بيها طريقة كلامنا مع نفسنا مهمه وليها تأثير كبير جدا، نفسنا بتسمع كل كلمه احنا بنقولها عنا ومع التكرار بيثبت فنفسنا الكلام البنقولو سواء حلو او وحش بلاش نكون عبئ زياده علي نفسنا بالنسبالي مريت بفتره زي دي قبل كده واكتر حاحه ساعدتني بعد فضل ربنا هو الكلام اللطيف الزي ده شكرا ليكي ولأختيارك انك تساعدي الناس مش مجرد القرايه فقط شكرا

26 September, 2021 at 11:27 pm
Reply
farah says:
i have read about self-love and choosing yourself first and all that but this allowed me to look at it from a different perspective when she said to “treat yourself like how you treat people you love”. This got me thinking about how i treat others around me and how often i can be harsh on myself. So this was a needed reminder that i deserve this love too just like my loved ones deserve it.

This reinforced my thoughts that i have : if a person did you wrong in the past (a toxic friend for example) it is important to move on because the only person i am harming is me. So i am thankful to god because these experiences taught me lessons about how to value myself.

26 September, 2021 at 11:35 pm
Reply
basmaosama5 says:
انا اكيد ليا دور وليا قيمة، وقيمتي دي مش مشروطة ب انا بشتغل ايه او بعمل ايه، لا هي جاية من كون ان ربنا نفخ فيا من روحه وخلقني بني ادم مكرم
من اكتر الحاجات اللي عجبتني في المقال ده لاني دايما بحس اني محتاجه انجز حااجات معينه في حياتي عشان تكون قيمه و فعلا مجرد اني انسانه ده في حد ذاته يخلي ليا قيمه و اهمية ووحقوق تحترم في الدنيا ربنا كفلهالي لمجرد كوني انسانه

27 September, 2021 at 12:09 am
Reply
Nada ghanem says:
اكتر حاجه شدتني في كلام دكتور هبه .. هو فكره احترامي لنفسي و حقيقي المقال
ده جه في وقته جدا بالنسبه لي ، اي شخص بمرور الوقت و مع ضغوطات الحياه الي ملهاش حد ،و وجود كثير من الناس السلبيه و المقارنات الهدامه حواليه بيبدا ينسي هو مين و قد ايه هو شخص يستحق الاحترام لانه ببساطه بيدور علي الاحترام و حبه لذاته عند بشر زيه زيهم ، فتبدا صورته لنفسه تبقي اسيره موود و نفسيه الحواليه ، و ده أكبر غلطه ممكن يرتكبها الانسان في حق نفسه .
تاني نقطه عجبتني جدا في كلام الدكتور ، هي صيانه العلاقات ، الجمله ده لو اتفهمت صح حياتنا هتتغير ميه و تمانين درجه علي سبيل المثال حالات الانتحار و الطلاق هتقل بصوره كبيره…
الانسان غلبان جدا ، بيدور علي كلمه حب و تقدير من الي حواليه ، و اي علاقه لازم الحب و الاحترام الي فيها يتجدد علي عكس ما بنشوف من رجاله كتير بيبدأو يطفو زوجاتهم و يطفو حماسهم و حبهم للحياه و يكسرو فيهم بدل ما يكونوا سبب انهم يطوروا من نفسهم

نهايه انا مقتنعه اقتناعا تاما ان النقطتين دول مرتبطين جدا، الانسان يجب ان يقدر و يحاط بالحب و الاحترام الي يستحقه و لكن عدم وجود ده في علاقاته مينفعش باي شكل من الأشكال انه ينسيه نفسه و قدرها
مينفعش نطلب من الغير الحب و الاحترام و احنا اصلا مش عارفين نحب نفسنا

27 September, 2021 at 12:26 am
Reply
Omnia Rashed says:
اننا نفكر نفسنا بالامتنان لنعم ربنا الكتيرة لان ساعات كتير لما بنمر بصعوبات دماغنا مش بتشوف غير الصعوبات دي وبننسا اننا في نعم كتير موجودة حتي مع الصعوبات♥️

27 September, 2021 at 7:47 am
Reply
Sumaya Ayman says:
“أنت ليك قيمة، والقيمة دي مش مشروطة بأي شئ، القيمة دي عشان انت بني ادم ربنا خلقه ونفخ فيه من روحه”

الدكتور إبراهيم الفقي رحمه الله كان بيقول لازم نفرق بين الإنسان وسلوكه.. نحترم الإنسان، نحترم غيرنا لأن ربنا ميز الإنسان عن أي مخلوق تاني؛ سخرله السماء والأرض وميزه بالعقل.. حتى وإحنا مختلفين ده شي طبيعي سلوكيتنا مش متشابهه لأن حياتنا مختلفة وكل واحد اتربى بطريقة وبيئة غير التاني، ف مش معنى إن سلوك غيري مختلف عنه يبقى منتحترمش بعض،احنا بنحب بعض في الله لأن احنا بنحب ربنا ^^..
نسامح نفسنا ونسامح الناس التشافي مسؤوليتنا ودي ابتلاءات وأقدار ربنا سبحانه وتعالى هو الحكيم
وكلنا عارفين إن “من لا يغفر لا يُغفر له” التسامح مش ضعف بالعكس إحنا بنشيل حِمل من على كتافنا ونثبت لنفسنا إننا أقوى ونقدر نعدي أي موقف ونرجع أحسن من الأول وهنا بيكون التغيير ❤

27 September, 2021 at 10:00 am
Reply
Toqa medaney says:
A hardworking determined woman, wrote Cinderella secret and shahrazad on fire she’s always striving to bettering herself and educating people with her wonderful and rich knowledge about family relationships and raising children .. such an inspiring strong woman..♥️♥️♥️♥️♥️
أنت ليك قيمة، والقيمة دي مش مشروطة بأي شئ، القيمة دي عشان انت بني ادم ربنا خلقه ونفخ فيه من روحه
My favorite phrase in her article♥️
She’s helping people feel loved, self worthy and confident???
I’m still a teenager but her words really gave me goosebumps?
No words can describe how I felt after reading this and the way she describes her words and the meaning she wants to deliver??
Mashallah?♥️

27 September, 2021 at 10:53 am
Reply
rubaismail15 says:
انا بحب هبة جداً ودايما اما ببقا محتاجة دفعة عشان اتخطى حاجات بحب اسمعها ودايما بتنورنى لحاجات كانت غايبة عنى شكرا على وجودها ووجودك يا emma بشوف دايماً انى مهما اتوجعت واتصدمت بيكون سببه العشم دايما كانت مشكلتى انى بستمد قوتى من الناس وبتعشم فى الناس اوى ودايما كنت بتمنى يتعاملو معايا زى ما بتعامل معاهم لان الناس كلها مش زيك ومش زى قلبك نفسى اوصل انى اقلل سقف توقعاتى وعشمى فى الناس لدرجة اما حد فيهم اما بيمشى كنت بقع وده يعلمنا اننا لازم نحط مسافة بينا وبين الناس ومنديش الامان الكامل عشان اما يمشو منقعش ودايما بحس انى مع كل وقعة ووجع ليا اما بفوق وبقدر اقف على رجلى من تانى الوجع على اد مرارته على اد انه بيقوى قلبى وبيخلينى اقوى من كل مرة وبيخلينى احب واقدر نفسى وبالضبط كل ما الواحد مقدر ومعزز نفسه اللى حواليك هيبصولك نفس النظرة الحمد لله على الوجع اللى دايما بيفوقك وبيخليك تحب نفسك وانك كفاية ليك اكتر من اى حد

28 September, 2021 at 2:12 am
Reply
esoo says:
❤️❤️❤️❤️❤️

29 September, 2021 at 9:24 pm
Reply

Inspiring Women Series