Inspiring Women Series – Nada Maqboul

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

Nada Maqboul, a 22 years old interior designer who just graduated. Participated in World Architecture Community Award between 27 countries with her graduation project “tally hand craft hub”. She won in the competition next to 9 other winners internationally.

أحكيلنا أكتر عن مشروع التخرج بتاعك وبيتكلم عن ايه؟

مشروع التخرج اسمه مركز التلي للأشغال اليديوية. و هو ليه ثلاث اهداف, اول هدف هو اننا نحيي تراثنا عن طريق خامة اتعملت في القرن ال19 اسمها التلي في أسيوط. تاني حاجة اننا ندعم السيدات لأنه بيدي فرص للستات اللي في صعيد مصر انهم يشتغلوا ويكون ليهم دخل من المشروع دا. تالت حاجة العمل علي توفير فرص عمل لسكان اسيوط و ايجاد دخل ثابت للافراد حتي يعولوا اسرتهم و تقليل نسبه الفقر. المبني دا المفروض يكون في 3 أقسام، القسم الأول هو جاليري بيتكلم عن تاريخ التلي وكل التفاصيل عنه. وتاني قسم في المبني، ورشة عمل بتعلم الزوار ازاي يقدروا يستخدموا التلي لأنه خامته مختلفه عن الخامات المتعارف عليها. وتالت قسم بيكون عرض ازياء بيتعمل فيها عروض ازياء عشان يشوفوا الخامة دي شكلها ازاي في التصاميم النهائية. الثلاث أقسام دول بيركزوا علي فكرة أهميه تراثنا و بيدي فرص كتيرة لناس ان يكون ليهم دخل. دا سبب اللي خلاني أختار أسيوط والتلي لأنها تعتبر نقطة قوة في المكان دا

ايه ألهمك تقدمي مشروع التخرج في مسابقة المجتمع الدولي للعمارة؟

اللي الهمني أشارك في المسابقة هي أن المشروع بتاعي مختلف، و ناس كتير متعرفش ايه التلي، والمسابقة دي بتسلط الضوء علي المشاريع اللي بتكسب وبتخليها معروفة أكتر لمصممين ومصدر إلهام ليهم ممكن يستفادوا منه

لو حد الشغف بتاعه غير دراسته او شغله.. ازاي يقدر يحقق شغفه دا؟

بنسبالي مثلا أنا دراستي هي هندسة الديكور بس انا بحب جدا تصميم الأزياء ودا شغفي، وهو اللي ساعدني في مشروع التخرج، وبالرغم انه مش مجال دراستي قدرت أعمل حاجة ليها علاقة بيه، ودا حببني أكتر في اللي بعمله. فا أنا شايفه أن لو اي حد عنده شغف بعيد عن دراسته هو ممكن يستفيد منه بكل طريقة ممكنه ويخليه يحببه في دراسته وشغوف أكتر انه يعمل حاجة مختلفة. لأن لما حد يكون عنده علم من الدراسة وكمان علم جاي من حب وشغف، الأتنين دول لما بيتجمعوا بيطلعوا حاجة مختلفة جدا وبيخلوا كل حد يوصل لأعلي نقطة نجاح

ايه الصعوبات او التحديات اللي واجهتيها.. او ايه اللي شجعك توصلي للنجاح دا؟

المشروع بتاعي كان فيه صعوبات كتير، لأني كنت بحاول أمزج بين ثلاث حاجات صعب يتجمعوا في حاجة واحدة، بس بصراحة مكنتش بفوت فرصة أسأل وأدور عشان أوصل للحاجة اللي انا عايزاها، في طرق كتير مكنتش مفيدة بنسبالي، بس محاولتي هي اللي وصلتني للطرق اللي في الأخر استفدت منها

واللي شجعني أوصل للنجاح دا هو اني كنت مصدقة في اللي كنت عايزة أعمله و في الأخر كله توفيق من عند ربنا. وبجد كل التعب بيكون بسيط في الأخر لما الواحد بيحس انه عمل حاجة فعلا

ايه هدفك في الفترة الجاية؟

هدفي الفترة الجاية هي اني اعمل حاجات مختلفة، طبعا هشتغل في مجالي، هنسة الديكور، وحابة جدا أقدر أعمل للناس أماكن تكون مريحة بنسبالهم  وشبههم لأن دي حاجة مش موجودة قوي في مصر. لأن الديكور بيكون شبه المصمم أكتر من الناس اللي هيعيشوا ويستخدموا الأماكن دي. وبردو بحاول أقدر أوصل مشروع تخرجي للناس المناسبة عشان أقدر أنفذه

ادي نصيحة لحد لسه مش عارف ايه شغفه او حلمه.. يبدأ منين؟

أنصح بأن محدش يحط حدود لنفسه في أي حاجة، بالعكس، احنا بنعرف احنا شغوفين بأيه وايه نقط قوتنا لما بنجرب حاجات كتير ونحط نفسنا في أماكن ونشاطات مختلفة، ساعتها هيفهم هو عايز ايه