Radwa El Leithy’s Hijab Story

أنا بقالى ٥ شهور محجبة، أنا طبعًا عارفة إنى إتأخرت أوى بس أنا حسيت بأهمية الحجاب لما بدأت أحس إنى باخد ذنوب ملهاش أى لازمة. مع إنى إتأخرت لكن كل اللى حواليا إتفاجئوا جدا إنى إتحجبت وقالولى “هو فى حد بيتحجب اليومين دول! دى الناس كلها بتقلع”

شكلى كان حلو اوى بشعرى وكان جزء كبير من جمالى فيه، بصراحة شعرى وشكلى كانوا بيسهلو عليًا حاجات كتير اوى، بس مش مهم ربنا بجد بيعوض.. و أنا طول عمرى بحب الحجاب وبلبس محترم على قد ما أقدر بس ولا مرة قلت خلاص أنا هتحجب دلوقتى وسبحان الله جت كدة من عند ربنا من غير اى ترتيب

أنا مؤمنة جدا إن الحجاب مهم و مريح نفسيا للبنات اللى عايزة تقرب لربنا و إنه ربنا فرضه علينا عشان فيه خير وراحة بال كتير اوى وشياكة كمان، حتى فى زمانا دة اللبس المناسب للملكات والاميرات هو المحتشم المقفول. أنا مقتنعة ان لو كل البنات سمعوا كلام ربنا ولبسوا الحجاب هنعيش فى هدوء وشياكة وسلام نفسى .. أنا عايزة اقولكو إنى الحمد لله رب العالمين سعيدة جدا بالخطوة دى وحاسة إن لازم الواحد يلحق يعمل حاجة لربنا عكس مزاجة، وأصلا الحجاب مش بالصعوبة اللى إحنا فاكرينها الحجاب حلو وممكن نعمل أى حاجة “حلال” وإحنا محجبات عادى ونبقى فى منتهى الجمال والرقى

وعلى فكرة أنا إتحجبت على دخلة الصيف والحمد لله متعبتش فى الحر زى ما كنت فاكرة وأخيرا اللهم أرنا الحق حقًا وأرزقنا إتباعة وأرنا الباطل باطلا وأرزقنا إجتنابة