حياة متزنة.. وقلب مطمئن

كلنا بنسعى عشان تكون حياتنا مريحة، ونحس فيها بالسلام النفسي، وبالرغم من صعوبة دا في وسط مشاغل ومشاكل الحياة، إلا انه مش مستحيل. انك تكون عايش مطمن ومرتاح البال هي حاجة تقدر توصلها، بس هتحتاج تجهز قلبك عشان توصل للشعور دا. 

وهنا السؤال.. ازاي تخلي قلبك قادر يحس بالراحة والطمائنينة؟ 

١)أبعد عن المشتتات

ازاي قلبك هيكون مطمن وانت كل شويه بتتشتت بسبب كل حاجة حواليك؟ للأسف في الوقت اللي احنا فيه وبسبب انفتاح حياتنا على بعض بقى صعب تركز مع نفسك وبس.. فا عشان توصل لتوازن أكبر محتاج تكون واعي جدا وانت بتستخدم السوشيال ميديا. بلاش تفتحها في كل وقت، انت بتكون عمال تتابع حياة الناس وانت مش مركز في حياتك ودا بيحط عليك عبئ من مقارانات وعدم رضا كان ممكن تتجنبه لو بس استخدمتها بوعي، واخترت مين اللي بتعمله فولو وبتستفاد منه ايه.. 

لأن أي حاجة بتدخلها قلبك بتأثر عليك.. ف اسأل نفسك، ايه اللي بدخله لقلبي؟ هستفاد منه ايه؟ هيأثر على نفسيتي ازاي؟

٢)الكلام بحساب 

ربنا أدالنا القدرة على الكلام عشان نستخدمها في الخير والصح، وكل ما كلامك كان بحساب كل ما قلبك هيرتاح، متتكلمش على حد ولا تتريق على حد وحاول متخوضش في مواضيع ملهاش لازمه.. خلي كلامك بحساب عشان تحافظ على قلبك من سوء الكلام، اللي اكيد مش هيحسسك بأي طمأنينه.

٣)أختار ناسك

الناس اللي بتقضي معاهم وقت، ليهم أكبر تأثير عليك.. شوف أقرب دواير ليك واتأكد ان مفيش حد بيأثر عليك بالسلب ولو لقيت، خد خطوة لورا في علاقتك بالشخص دا وقرب من اللي بيقربك لأحسن نسخه منك، وبياخد بأيدك للصح وبيفكرك بالمبادئ السليمة.. عشان الصاحب ساحب.. ياترى صاحبك هيسحبك فين؟

٤)علاقتك بالله

كل الكلام اللي فوق مهم، بس هيفضل في حاجة ناقصه لو مهتمتش بعلاقتك بربنا.. لأن روحنا بتحتاج الوصل دا زي ما جسمنا بيحتاج الأكل والشرب عشان يعيش.. علاقتنا بربنا هي اللي بتحقق التوازن في حياتنا وبتخلينا نشوف حقيقية الدنيا صح.. فا نعيش فيها بالنا مرتاح وقلبنا مطمن بالله.