Inspiring Women Series are to showcase some of the successful modest women out there, who succeed not inspite of their hijab but because of it.
مي علوي، ٣٦ سنة، استشارية علاج نفسي وتربية أطفال، ومؤسسة منظمة رايزنج هابي لخدمات التربية والعلاج النفسي
أحكي لنا ايه الحاجة اللي ألهمتك انك تغيري مجالك و تخلي علم النفس يكون هو مجال شغلك؟
بعد ما اتخرجت قعدت أجرب أشتغل في كذا حاجة ومكنتش لاقيه حاجة بحبها وكنت بامشي كتير من الشغل ، والحاجتين اللي لاقيت نفسي بحبهم هما التدريب والتدريس فا عرفت اني مهتمه ب ده. اني أفهم الناس وايه بيساعدهم انهم يتغيروا، مع الوقت فهمت ان الوضوع له علاقة بعلم النفس أكتر وحسيت أن مساعدة الناس دي أكتر حاجة بتلهمني فا قررت اني أعمل ماجستير وكنت ساعتها لسه أم جديدة وقت ما بدأت أذاكر، وكنت عارفة أن المشوار طويل بس قلت خلاص و سافرت إنجلترا وأخدت شهادة في التربية وأسست رايزينج هابي
من وجهة نظرك ايه الصفات اللي بتساعد الشخص انه يحقق نجاحات كتير بالذات في سن صغير زيك؟
حاسة إنه ممكن يكون الأستعداد، أني آخد المجازفة في حاجة وانا مش عارفة ايه اللي هيحصل، استعداد ان في النص أكيد هتكعبل وهغلط ويكون عندي مرونة اني هقف تاني واتخانق واحاول أكمل واجرب حاجة تانية، استعداد اني أعرف أعيش وانا مش عارفة الموضوع هينجح ولا لأ، ان يكون في إلتزام مهما كانت الظروف أو العقبات اللي قدامي، إني أكون عارفة أن الدنيا مش علي طول هتكون مثالية ولا الهدف منها اني ابقي دايماً أنجح واحدة و أشطر واحدة
وأكتر حاجة حسيتها مهمة هو أن يكون عندنا استعداد نخرج برا القوالب اللي محطوطالنا شوية سواء ان النجاح ده له شكل معين، أو إني في سن معين أكون حققت حاجات معينه، أو إني عشان أم المفروض أضحي بحاجة عشان حاجة، أو أختار بين اني أبقي أم بالشكل الفلاني أو اني أبقي ناجحة في شغلي بشكل معين
أعتقد أن كل واحد يلاقي معادلة لنفسه تساعده انه يحقق الحاجة اللي هو عايزها بالشكل اللي هو عايزة هي الحاجة اللي ساعدتني أنجح
شايفة ان إيه أهم الحاجات اللي المفروض نعملها عشان صحتنا النفسية تكون سليمة؟
أبسط حاجة ممكن نعملها هو الأهتمام بنفسنا. والأهتمام بالنفس له أشكال كتير جدا. أولها الاهتمام بصحتنا، اننا ناخد بالنا من أكلنا وصحتنا ومن نومنا. وفي الاهتمام بعواطفنا، ان يبقي عندنا مساحة نتعامل مع مشاعرنا بشكل صحي، وان يبقي في حد أقدر اني أتكلم معاه وأنا مرتاحة وعارفة أنه هيعرف يسمعني. ممكن أعبر عن الجوايا بأشكال تانيه زي الكتابة أو الرسم وطبعاً اننا نعمل أي رياضه ده مفيد لجسمنا ونفسيتنا
وفي الاهتمام الروحاني، الصلاة والدعاء والتأمل والذكر والقرآن، الحاجات اللي بتفصل عن الحياة المادية. وفي الاهتمام الإجتماعي، وهو اننا نهتم بالعلاقات المهمة في حياتنا ونستثمر فيها باننا نقضي وقت أكتر مع بعض ونتكلم أكتر و نبعد عن العلاقات اللي بتضرنا. وبردو نبعد كمان عن الحاجات اللي بتضرنا زي التركيز الزايد مع الأخبار والسوشيال ميديا، وطبعاً مش هنعرف نعمل كل ده في نفس الوقت بس مهم نعرف إيه أكتر حاجة محتاجة اننا نركز عليها و ممكن نختار حاجة من كل جانب نحاول نحافظ عليها
طبعاً في شغلك بتقابلي مشاكل كتير تخص الأطفال والأهالي، والعلاقات.. فا إيه أكبر تحديات ممكن تواجهك أوقات الجلسات دي؟
انه أوقات الشغل ممكن يبقي في ضغط نفسي عالي وبنسمع حاجات كتير صعبة بتحتاج مننا طاقة نفسية كبيرة، وطبعاً اتمرنا كتير جدا علي ازاي نعرف نفصل بين الشغل وحياتنا ونهتم بنفسنا. بس من الناحية التانية بتكون حاجة جميلة لما بحس ان في حد عرفت أساعده ان حياتة تبقي أهون أو سهلت عليه وساعدته يشوف حلول أو حتي بس وفرت مكان للشخص أنه يعبر ويكتشف نفسه من أول وجديد، الجزء ده بحس انه بيغطي أكتر بكتير الجزء الصعب والمتعب في الشغل
ازاي نربي أولادنا من الصِغَر علي انهم يتمسكوا بعقيدتهم وهويتهم؟
مهم أوي أن مبادئنا وأولويتنا تكون واضحة قبل أي حاجة ونفكر دايماً واحنا بناخد أي قرار انه مش دايماً مهم خناقة دلوقتي هنطلع بيها ب إيه قد ما مهم اللي أنا بحاول أزرعه فيهم علي المدي البعيد. بشكل عام اللي بيساعد علي تكوين المبادئ دي عند ولادنا أربع حاجات. أول حاجة، أننا نكون بنتكلم عن المبادئ دي كتير في البيت بطرق مختلفة حسب العمر، فا بنتكلم عن حكايات أو مواقف احنا مرينا بيها واتصرفنا ازاي
وتاني حاجة أنهم يشوفونا بنطبق المبدأ ده في حياتنا، لإنهم بيتعلموا أكتر بكتير من اللي بيشوفوه مش اللي بنقوله، فا لو باتكلم في حاجة مش بطبقها عمرهم ما هيتعلموها. تالت حاجة اننا نبدأ نكون العادة. محتاجين نساعدهم يترجموا المبادئ دي لأفعال ملموسة يقدروا يقيسوا بيها هما عايشين المبدأ ده ولا لأ. ورابع حاجة اننا نشجعهم و نعلق بإيجابية علي كل حاجة إيجابية بيعملوها حتي لو مش واخدين بالهم منها وصغيرة أو حتي بيعملوها بسهوله
إيه أهم 4 نصايح ممكن تقوليهم لكل أم أولادها في سن المراهقة؟
أول حاجة اننا نتفهم ان المرحلة دي صعبة عليهم زي ما هي صعبة علينا، فيها تحديات كتير ليهم وحاجات كتير عكس بعض. تاني حاجة ودي بجد مهمة جداً، هو اننا نسمعهم من غير ما نحكم ونحسسهم اننا مساحة آمنه ليهم من حقهم ييجوا يتكلموا في أي حاجه في بالهم أو حصلت لهم وميكونوش حاملين هم رد فعلنا
تالت حاجة اننا نحاول نخش في الدنيا بتاعتهم ونتعلم عنها لو عايزين نقرب منهم ونفهم أكتر عن اللي بيعملوه، بخصوص مثلا الإنترنت والألعاب اللي بيلعبهوها والأفلام والمسلسلات اللي بيحبوها، نحاول يبقي عندنا دراية بكل ده. رابع حاجة هو اننا نحط حدود واضحة وصريحة، لإن في السن ده هيحاولوا يمتحنونا طول الوقت، وهيجربوا يكسروا كل القواعد اللي إحنا حطينهالهم قبل كده ويشوفوا آخرنا فين، الحدود دي مهما ضايقتهم بتديهم إحساس بالأمان وعدم وجودها أو عدم الثبات علي الموقف من ناحية الأهل بيسبب لهم لخبطة. وقدام ده يكون عندهم مساحتهم بردو اللي بياخدوا فيها قرارتهم ونحترم القرارات دي عشان هما كمان يحترموا الحدود اللي انا حطاها
و إيه الحاجات اللي بتقدميها حالياً؟ Raising Happy في أي خطط جاية حابة تعمليها في
هي مؤسسة اجتماعية مخصصة لرفع الوعي عن وسائل التربية السليمة Raising Happy
بنقدم ورش للتربية، و ورش للمدرسين، وبنقدم استشارات تربوية ونفسية للأفراد والأسر والمتزوجين، وبنتعامل مع الجمعيات اللي بتتعامل مع الأطفال، بنمرن العاملين فيها، وبنقدم توعية مجانية من خلال المحتوي علي وسائل التواصل الأجتماعي لرفع الوعي عن احتياجات الأطفال
اللي نفسي نركز فيه الفترة الجاية وبدأنا فيه شويه بالفعل، هو تمرين ناس متخصصة في مجال التربية من خلال برنامج احنا عاملينه، وده لسببين، لإني لما بدأت مكنتش حاسه إن الحاجات المتاحة كفايه انها تطمني ان أنا عندي المحتوي الكافي اني أتكلم مع أولياء الأمور، والسبب التاني هو ان التدريب هيساعد عدد أكبر من الناس يساعدوا الأهالي في تربية أولادهم ومش هيكون مقتصر علي مؤسسة معينة أو عدد أفراد محدودين
