Menna Sherif's Hijab Story

قوليلنا لبستي الحجاب أمتي؟

أتحجبت من 11 سنه، الموضوع كان صعب شويه عشان كنت بلعب كذا رياضة وأكتر حاجة حستها مش هتنفع مع الحجاب هي السباحة..

مين أكتر حد شجعك تلبسيه؟

مكنش في دعم من اللي حوليا قوي بس كان في واحدة صاحبتي أتكلمت معاها وقلتلها أني عايزة أتحجب بس الموضوع صعب.. وكان عندي أسئلة كتير، هكمل ازاي رياضة ولو عندي مناسبة أو فرح هلبس ايه وهعمل ايه.. بس صاحبتي كان عندها إجابات علي كل الأسئله دي وساعدتني جداً

طب وعملتي ايه بعد كدة؟

خدت القرار فجأة! نمت صحيت اليوم دا، كنت نازلة أجيب حاجات، لبست الحجاب ونزلت! بس كده!

جالك أفكار أنك مش قادرة تفضلي لبساه؟

اه ساعات كان بيجي عليا وقت كنت بحس أن أنا عايزة أقلع الحجاب أو بيكون عندي أفكار طب دا أنا شكلي احلي منغير الحجاب.. وكنت بحس أوقات أن لبسي مش مناسب مع الحجاب فا أقلعه وخلاص أحسن!

كنتي بتواجهي الأفكار دي أزاي؟

كنت بحاول أفكر بطريقة تانية، أن الجمال مش بس بيكون في الشكل ولا بينقص لما البنت بتغطي جزء منها، بالعكس الجمال كمان في شخصية الواحد وطريقته مع نفسه ومع اللي حواليه..

و كمان كنت بفكر أن بدل ما أقلع الحجاب، طب ما أنا ممكن ألبس لبس يناسب الحجاب، ومن أكتر الحاجات اللي شجعتني أن EMMA كلموني في الوقت دا وشجعوني جدا أني أتمسك أكتر بالحجاب

ولما صوري بتنزل كلام البنات وتعليقاتهم شجعتني جدا وفرقت معايا في الفترة دي أني أتمسك بحجابي وأقرب من ربنا..

تحبي تقولي إيه لأي بنت مرت بتجربه شبهك؟

أنك لما تقفي قدام مرايتك متحسيش أنك مش كفاية بالعكس، حبي نفسك زي مانتي وأعرفي أنك حلوة بكل حاجة فيكي..

وان مفيش معيار واحد للجمال، كل بنت حلوة بتفاصيلها المختلفة، و كوني عارفة أن الجمال مش بس الشكل، جمالك كمان في شخصيتك وروحك.. فا دايماً أستثمري في نفسك وطوري منها، وهتنوري من جوا ومن برا.