Inspiring Women Series
IWS Interview – Eman Reyad
Inspiring Women Series are to showcase some of the successful modest women out there, who succeed not inspite of their hijab but because of it.
تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه
ايمان رياض إعلامية مصرية ، بدأت فى قناة إقرأ
MBC Masr و بعد ٧ سنوات انتقلت الي قناة
لتقدم برنامج من القلب للقلب، زوجة و أم لطفلين ، ترى ان الأسرة هى أولى أولوياتها ثم عملها التي تبث من خلاله مبادئها و افكارها و تستضيف ضيوفها فى مواضيع مختلفة تخص و تهم المرأة و الأسرة العربية
احكي لنا امتى إتحجبتي؟
أنا محجبة بقالي 20 سنة الحمد لله ، طبعا السنين عدت بسرعة. فرحانة بستر ربنا لي و إن ربنا مثبتني علي ده. و بمنتهي الأمانة ماينفعش حد يحس إن هو اللي عامل حاجة. ماحدش فينا كبير علي الغلط ، ماحدش فينا كبير إنه لاقدر الله يرجع للوراء ، عشان كدة الواحد دايما بيقعد يقول لنفسه الحمد لله يارب و (لَئِن شَكَرْتُمْ لَأَزِيدَنَّكُمْ) و في نفس الوقت الواحد بيقعد يقول يارب سترك ، يارب كملها علينا. و مهم انه الواحد لما يشوف حد رجع عن الطريق ندعي له ، ناخد بايده ، من غير نظرة تكبر
لأ معلش إنتي مش أحسن منها و أنا مش أحسن منها ، ماحدش أحسن من حد. و الستر بييجي من عند ربنا و إحنا بندعي ربنا يثبتنا
ازاي أخدتي قرار الحجاب؟
كان عندي 19 سنة و فجأة حسيت انه لأ أنا عايزة اتحجب ، مش عايزة حد يشوفني و عايزة اتغطي أو اتستر بأي شكل ، متضايقة اني بامشي في الشارع و الناس بتبص لي بشكل معين. دلوقتي حتي لو حد بص لي مش ببقي متضايقة لإني شايفة اني عملت ال عليا. و أنا اللي بختار هما يبصوا علي ايه (دماغي ، طريقة كلامي ، لو لابسة لبس واسع عشان أشجع المحجبات) حسيت الإحساس دة و حسيت إني لازم اتحجب ، ف أنا كنت عايشة في اسكندرية و سافرت القاهرة عند أختي عشان أهلي كانوا حيرفضوا ، فرحت عند أختي و اتكلمت مع جوز أختي و هو كلم ماما و قال لها مبروك إيمان حتتحجب. في الأول كانت بتقول إزاي دي لسة صغيرة ، طب حاتعمل ايه في الفرح؟ حاتتجوز ازاي؟
و إبتدت تجيلي في نقط ضعفي زي “إيمان انتي عارفة دة معناه انك مش حاتنزلي البجر أبدا” و أنا باموت في البحر و وقتها ماكنش فيه أماكن للسيدات ولا مثلا ربطات طرح لسني ولا أي حاجة ، كان اللي في سني محجب كانوا واحدة اتنين مثلا مش رقم كبير. بس قررت إني اتحجب و صممت و نمت طول الليل بعيط حاسة إن ربنا حياخدني قبل ماتحجب.
إيه أول إختبار إتحطيتي فيه بعد الحجاب؟
أنا من قبل ماتحجب و أنا نفسي أبقي مذيعة و سبحان الله قدمت في كذا قناة و أنا لسة طالبة في الجامعة. و قدمت في قناة معروفة أوي وقتها قبل الحجاب و إمتحنت و قالوا لي حنرد عليكي في خلال أسبوع و مردوش ولا حتي بعد اسبوعين و بعد ماتحجبت ب 3 أيام كلموني و قالوا لي مبروك إنتي نجحتي قلت لهم بس أنا إتحجبت و وقتها ماكنش في حاجة إسمها مذيعة محجبة ، فقالوا لي إزاي تعملي كدة؟ قلت لهم ببساطة انا إخترت ده فكان أول إختبار إتحطيت فيه بعد 3 أيام حجاب و أهلي مش موافقين فممكن أرجع تاني عن قراري و كنت لسة في القاهرة ف لسة ماحدش من الناس اللي أعرفهم في اسكندرية شافوني.
بس أنا الحقيقة فاكرة كويس أوي وقتها قعدت أصلي و أسجد و أعيط و أقول يارب أنا في اختبار رهيب أنا مش قده يارب قويني أنا ضعيفة أنا عايزة أبقي مذيعة.
و الحمد لله يارب ثبت و اعتذرت لهم و قلت خلاص بناقص الحلم ده. و كنت في فنون جميلة و كملت جامعتي وإشتغلت مديرة فنون ومنسقة أزياء لبرنامج تلفزيوني عشان أبقى قريبة من أي مجال يوديني القاهرة يوم أو يومين تصوير و ارجع، لإن أنا بعيدة عن المجال ولا أنا اعلام مثلا ولا لي واسطة و في نفس الوقت عايشة في اسكندرية ، فكنت بصور في القاهرة و أرجع. و سبحان الله في الفترة دي جت لي الفرصة بقي : كان في عارض أزياء في إعلان ، أنا فاكراه كويس أوي لحد النهاردة مع إننا ماشتغلناش كتير مع بعض ، قال لي في قناة جديدة بتفتح و عايزين مذيعات محجبات. طبعا الولد ده أنا بادعيله لحد النهاردة لإنه كان السبب بعد ربنا سبحانه و تعالي إني أحقق حلمي بحجابي مع إنه مش مسلم و قال لي علي القناة و رحت و عملت الاختبار و نجحت فيه الحمد لله و بدأت رحلتي بقى …
ايه اول قناة اشتغلتي فيها؟
أول حاجة إشتغلت فيها كانت قناة (الناس) و محدش كان يعرفها غير مامتي ساعتها 🙂 و كانت بتسجل لي شرايط فيديو للحلقة و ارجع اسكندرية اتفرج علي نفسي و امسك ورقة و قلم و اكتب ملاحظاتي علي كل تصرفاتي ، بعلم نفسي بنفسي و بنصايح من مامتي. و في الوقت ده كانوا طالبين مذيعة في قناة (إقرأ) تطلع 5 دقايق بس في برنامج تطلع تقرأ المراسالات
ف رحت عملت الاختبار و نجحت و بقيت أعمل الفقرة دي و قعدت باعملها تقريبا سنتين. بعد سنتين جاتلي فرصة إني اعمل برنامج اسمه (جنتي) في نفس القناة و دي كانت بداية فتحة الخير عليا لانه البرنامج بتاعي لوحدي، يوم في الاسبوع ساعة واحدة علي الهواء مباشرة في قناة عالمية الحمد لله. و قعدت في البرنامج 7 سنين. كان الحمد لله ناجح و كان عن المرأة المسلمة و كل حاجة متعلقة بيها. و كان كل رمضان خلال السنين دي بنعمل برنامج مختلف ، بنوقف ال برنامج اللي انا بقدمه خلال السنة و نعمل واحد جديد.
احكي لنا ازاي وصلتي للنجاح اللي انتي فيه دلوقتي؟
من التحديات اللي قابلتها في حياتي ، و أي حد أكيد بيمر بتحديات. الفكرة بس إنه يعرف يتعامل معاها. أنا كنت في اسكندرية و كنت بسافر القاهرة أصور و أرجع في نفس اليوم و لو خلصنا متأخر أي يوم ببات عند أختي و أصحي تاني يوم أروح اسكندرية. و طبعا ممكن حد يفكر ليه أسافر كل يوم من بلد لبلد علشان 5 دقايق مش بتلحق حتي أتشاف فيهم ، و فعلا أنا ماكنتش بلحق أتشاف فيهم بس كنت باثبت لنفسي اني يارب باعمل اللي عليا. أنا ربنا بعت لي فرصة و مسكت فيها و أنا راضية بيها و حاجتهد فيها علي قد ما اقدر و في نفس الوقت باطمع في كرم ربنا إن يبقي عندي فرص أكبر لكن عمري ما اقول للفرصة الصغيرة لأ. كان ممكن أسافر من اسكندرية للقاهرة علشان إجتماع و ابقى أول واحدة هناك و كان ممكن يتلغي عادي جدا و ماكنتش أزعل ولا اتذمر. في الاخر ده شغل و المدير ممكن يلغي في اي وقت لأي سبب. ف الانسان لازم يشتغل علي نفسه و يتعب علشان ربنا بيكافيء بالتعب ده ، و طبعا بالدعاء و لكن السعي مهم جدا حتي لو بنوافق في الأول علي حاجات صغيرة ف هي سلمة في الأول و في الأخر توصلنا لهدفنا.
المرحلة الثالثة بقى كانت إنتقالي من (إقرأ) اللي كنت باعتبرها أمي ، لإني قعدت فيها كتير جدا و إتعلمت و كبرت هناك بمساعدة كل الناس اللي هناك و بالمذاكرة المستمرة ، فجالي بناءاً علي الرحلة دي عرض في mbc masr و طبعا ده كان عرض رائع فالحمد لله طبعا و أول ما جالي العرض رحت لمدير (إقرأ) و قلت له أنا صعبان علي أمشي من هنا و اخدت رأيه قال لي هو إنتي لما جوزك اتقدم لك قلتي أنا صعبان علي أمشي من بيت أهلي؟ قلت له لأ ، فقال لي بالضبط هي الحياة كدة لازم تمشي و إحنا بنتحرك من مكان لمكان. فكان تشبيهه جميل و دة خلاني أفضل متعلقة بقناة (إقرأ) و علي طول حاسه انها الأم. و الحمد لله ربنا كرمني و السنة دي يبقي خلصت 6 سنين معاهم في برنامج (من القلب للقلب) الحمد لله.
ايه اولوياتك في الحياة؟
أنا كأم و زوجة و باشتغل فعندي حياتي الأسرية هي رقم واحد و دايما باقول إن نجاح أي انسان لازم يرتب أولوياته في الحياة. ف على قد ما باحب شغلي على أد ما هو رقم 2 في حياتي مش رقم واحد. فأي حاجة تيجي في شغلي بتتعارض مع بيتي و ولادي باعتذر. فباغتنم الفرصة اني أملأ 7 تانكات في حياتي و باحب أقول تانك عشان بحسه أدق تعبير له. ف مهم اننا نملاهم بالتساوي. في ناس بتموت نفسها في الشغل و التانكات التانية فاضية فتلاقي نفسها متضايقة و تعبانة بعد فترة.
فخليني أقول التانكات كدة بالترتيب
(١- علاقة الإنسان ب ربنا (أهم حاجة في حياة الإنسان
(٢- علاقته بأسرته (الزوج و الأولاد
(٣- علاقته بالأسرة الأكبر (الأم و الأب و الاخوات و العم و الخال و هكذا
(٤- نفسي (أنا فين و عايزة ايه و ايه راحتي
(٥- الصحاب (الصحبة الصالحة اللي بجد
٦- العمل التطوعي (ناقص شوية عند بعض الناس بس هو من الحاجات الأساسية اللي لازم كل إنسان يكون بيعمله و بيهذب النفس لأبعد الحدود
احكي لنا عن العمل التطوعي في حياتك؟
بالنسبة للعمل التطوعي ، في حاجات تانية احنا كصحاب مع بعض بنعملها ، و في اكتر من جمعية أنا مشتركة فيها (جمعية حياة بلا تدخين – مركز الزهايمر “أول مركز في الشرق الأوسط كله” – دار أبي للمسنين الرجاله – دار أمي للمسنين السيدات – دار ضنايا للأيتام) و مستشفي بهية و هي للكشف المبكر و علاج سرطان الثدي بالمجان. مستشفي بهية أنا باشوفها نور و متعلقة بها جدا لأبعد الحدود و باروحها مرة علي الأقل في الشهر باقعد مع المحاربات وقت الجلسة و نقعد في أعياد الميلاد مع المحاربات و نجيب تورتة و نحتفل و ساعات بنجيب ناس هما بيحبوهم يقعدوا معاهم و يتصوروا و يحتفلوا. الأنشطة في بهية كتير و في دور كامل للدعم النفسي و دي من أهم الحاجات لإن كل ما معنوياتهم بترتفع كل لما نسبة الشفاء ارتفعت. ف كل حد بيتطوع في الجانب النفسي ده كل لما كان سبب بإذن الله في شفائهم.
سمعنا انك بتجهزي لحاجة اسمها بهية بوتيك ، ممكن تحكي لنا عنها؟
من خلال زيارتي ل بهية و أنا بقالي أهو 3 سنين معاهم حسيت لما أنا ببقي مضايقة باعمل ايه؟ ف ساعات باعمل شوبينج من ضمن الحاجات اللي بتفرق معايا ، طيب هما محاربين يا حبايبي ف حيعملوا ده ازاي؟ ففكرنا اننا نعمل حاجة اسمها بهية بوتيك جوة المستشفي و حيبقي افتتاحه قريب ان شاء الله ، بناخد هدوم، شنط، اكسسوارات بحالة جيدة جدا أو ممتازة (لا نقبل قطع بالية أو تالفة) من أي سن سواء رجالي أو حريمي أو أطفال علشان لو حتي حاجة عجبتها ممكن تجيب لأختها أو اخوها أو بنتها أو ابنها و بنكويها و نحطها في بهية بوتيك فالمحاربة و هي في المستشفي تاخد ميعاد و تروح هناك و تاخد اللي هي عايزاه مبروك عليها بالمجان. طبعا في نظام بحيث كل حد ياخد بشكل عادل. و الحمد لله اللي ساعدني في المشروع ده ، اللي كان حلم بالنسبة لي ، هما صحابي و بادعي لهم من كل قلبي لان هما فعلا كانوا بيسارعوا للخير.
هل في شوية تحديات او مخاوف بتواجهك بالنسبة لبهية بوتيك؟
عندي اه شوية مخاوف ، ان الحمد لله ربنا اعاننا في كل حاجة ليها علاقة ب بهية بوتيك ، لكن خايفة من عدم الاستمرارية. خايفة شوية اني اعشم المحاربة علي الأقل مرتين في السنة (شتوي و صيفي) و تبقي مطمنة لده و بعدين تيجي مرة متلاقيش ف ده احدى مخاوفي بس طبعا بارجع أفكر نفسي ان دي حاجة في الأول و في الآخر لوجه الله سبحانه و تعالى. ربنا ان شاء الله مش حيسيبني و المشروع حيستمر حتي بعد عمر طويل ان شاء الله.
إن شاء الله المشروع يستمر، أهل الخير كتير . سعدنا باللقاء وربنا يبارك ويتقبل لكل من ساهم في إدخال السرور على قلب مريض أو محتاج
ربنا يثبتنا جميعا و ويرزقنا رضاه و الجنة ❤
Thank you for sharing your incredible journey with us ?
Ameen! Glad you enjoyed reading it Nahla ❤
Very proud mashallah❤️
♥️♥️♥️
Mashallah rbna esptna kolna yarab ♥️
آمين ♥️ ♥️
ممكن معلومات اكتر عن بهية بوتيك وازاي ممكن نبعت الملابس وخصوصا لو من المحافظات
ابعتي رسالة علي ٠١٠١٠٢٦٤٥٦٠
كل كلامك جميل ما شاء الله ? ازاي ممكن نساعد بهية بوتيك؟
ابعتي رسالة علي ٠١٠١٠٢٦٤٥٦٠
Enjoyed reading your story dear Eman ♥️ Please more info on Baheya Boutique and who to contact to send items?
Glad you did Rahma! Sure, sent info by email ❤
انا نفسي ابقي مذيعة مشهورة زيك ♥️ لازم ابدأ في قناة او برنامج ديني لو محجبة؟
مش لازم ، اعقدي النية واجتهدي وربنا يفتح لك ابواب الخير
سبحان الله، فعلا الحجاب ما بيمنعش أي حد من النجاح في اللي بيحبه طول ما نيته صافية زيك ?
شكرا ليكي، ده من ذوقك ?
الله يثبتنا ويثبتك ✨?? ممكن أعرف البلوزة منين؟
آمين ? من اليونان
شيك اوي ومحترمة وكلامك زي العسل ? يا ريت كل المذيعين يبقوا كدة
شكرا ليكي، ده من ذوقك ?
انا عايزه اتبرع بهدوم حالتها كويسه اعمل ايه ؟
ممكن تواصلي مع بهية على انستجرام http://www.instagram.com/baheyafoundation