Inspiring Women Series – Maha Gamil

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

مها جميل، 30 سنه، خريجة كلية فنون جميلة، وفنانة موهوبة في الرسم علي الجداريات

احكيلنا ازاي بدأتي مشروع الرسم علي الحيطان؟

كان عندي شغف وطاقة كبيرة من وانا ف الكلية، حبيت اطلعها في الشارع وحمسني فكرة فرحة الناس لما يشوفوا الرسومات، وبدأت اول مشروع ليا ونزلنا رسمنا في اسوان، والجدارية ابهرت ناس كتير من اجانب ومصريين. وكان معايا فريق كبير من رسامين ومتطوعيين من بلاد مختلفة

ايه اللي بيلهمك لرسوماتك؟

بيلهمني الثقافات المختلفة لكل بلد وتفاصيلها، وبحب اتكلم مع أهالي البلد عشان اعرف اكتر عن حياتهم ودا دايما بيساعدني أطلع الجداريات بشكل حقيقي أكتر

ايه تأثير الرسم عليكي شخصياً من الناحية النفسية؟

جزء مهم جدا في الرسم هو التأمل في خلق الله وكل التفاصيل حواليا، بيفرق معايا جدا وبيساعدني اني اشوف حاجات ممكن اكون مش شيفاها قدامي، بشوفها بشكل أعمق. دا نفسيا مش بس بيساعد في الرسم، ولكن بيخليني كمان متصله بنفسي اكتر، وبيخلي تعاملي مع الناس يكون اكثر شفافية.

والجانب التاني، هو انه بينمي عندي الشجاعة في كل مرة كنت بنزل ارسم في الشارع دا كان بيديني جرأة اكتر، فا نفسيا اول مرة نزلت غير لما بنزل دلوقتي اكيد

لو حد بيحب الرسم، ازاي يقدر ينمي الموهبة عنده؟

لو سن صغير من 4 سنين مثلا، فا ممكن الأهل يجيبوا للطفل أدوات رسم ويجيبوله شخصية من شخصيات الكرتون اللي بيحبها ويبدأ يركز في انفعالات الشخصية المختلفة ويقلدها

لو من سن 20، يحاول يركز في كل التفاصيل حوالية من الطبيعة ويرسمها لأن دا بيغذي العين جدا وبينمي الموهبة بالوقت والتمرين الكتير، وميضايقش لو طلعت مش حلوة، بالتكرار هيتحسن جدا. مهم بردو يشوف الأضاءات فين ويحاول يعكسها في رسوماته، ويرسم بأي خامات مش شرط حتي حاجات غالية

لو حد كبير في السن، ممكن يشوفوا الفنانيين بيرسموا ازاي ويبدأوا يقلدوهم ومع الاكرار هيتحسنوا جدا، وممكن الشباب يعملوا كده بردو بس بيكون احسن انهم يستلهموا من الواقع اللي حواليهم

بتشوفي ايه اهمية العمل التطوعي؟

العمل بدون مقابل بيكون ليه شعور مختلف وترابط أكتر بين الناس اللي بشتغل معاهم، وبيحسسني اني متصله أكتر بإنسانيتي

ايه اهدافك الجاية؟

اني ارسم علي مساحات اكبر بكتير عشان هتدي طاقة اكبر ومعني احلي للجدارية. واني اقدر افيد غيري من الفنانيين المبتدئيين في المجال بالعلم اللي عندي