Inspiring Women Series – Nour Shokry

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

نور شكري، ٣٥ سنه، متعافية من سرطان الثدي ومؤسسة جروب Together We Cancer

لدعم مرضي السرطان وتوفير مجتمع آمن ليهم

ايه اللي ألهمك تبدأي الجروب؟

انا اتشخصت بالسرطان في ٢٠٢٠ ولما اتشخصت مكنش فيه اي قصص حقيقية اسمعها واعرف منها الناس اللي خدت كيماوي حصلهم ايه و بيتاعيشوا مع الموضوع ازاي، بيروحوا الشغل ولا لأ، كل الجروبات الي كانت موجوده كانت برا مصر ودا مكنش ليه  علاقه اوي بالأمور الحياتيه في مصر فا مكنش فيه مجتمع داعم الاقي فيه ناس شبهي وبيمروا بنفس تجربتي
وانا مؤمنة ان لما ربنا يديني نعمه زي وجود ناس بتدعمني منهم اهلي والدكاترة وصحابي، واجبي اني اساعد انا كمان الناس واوفرلهم دا

احكيلنا اكتر عن ال cancer coaching

انا لما عملت الجروب كنت بساعد بس منغير اساس علمي، كان دعم اكتر، كنت محتاجة اخد تدريب يساعدني اقدر اقدم الدعم دا بشكل أشمل، والتدريب بيساعد مريض السرطان واهله انهم يمروا بالفترة الصعبه دي وبيعلمهم ازاي يتعاملوا مع مشاعرهم. لأن لما حد بيمر بحدث كبير زي السرطان بيدخل شخص وبيخرج شخص تاني فا انا بعلمهم ازاي يتقبلوا نفسهم اثناء الحدث وبعده، وازاي يسامحوا الشخص الجديد اللي طلع من الحدث دا ويتقبلوه ويحبوه زي ما هو

ايه اللي اتغير في نظرتك للحياة بعد التجربة دي؟

اللي اختلف ان نور قبل السرطان شخص وفي السرطان شخص وبعد السرطان شخص تاني خالص. والحمد لله ان انا متصالحه مع الصورة الجديدة من نفسي، وتصالحت مع المحدودية في حاجات كانت عندي قبل ما أمر بالتجربة دي
ومبقتش عندي سواء محدوديات جسدية او شعوريه. ودي حاجة مهمه لأن في القبول راحة، لو متصالحتش مع دا وتقبلته هعيش حياتي مش مرتاحة.

بعد تأسيسك للجروب، لاحظتي ان ايه اكتر حاجات شكلت فرق واختلاف بسبب وجود مجتمع داعم بيتشافي مع بعضه؟

اكتر حاجة فرقت اني حسيت اننا بنغير الفكرة اللي بتتاخد عن حد عنده سرطان، انه حد تعبان ومنهك ومكتئب.. لأن الموضوع في الحقيقة مش بيكون كده خالص، الناس ممكن تشوفنا ومتعرفش اصلاً ان عندنا سرطان، بنكون ناس عادية مش دايما زعلانين او مكتئبين وبيفرق لما بشوف كل حد قبل ما يدخل الجلسات اللي بنعملها بيكون مضايق وبيخرج عنده أمل وقبول أكتر بسبب الدعم والأمان اللي بيحسوا بيه

ايه الخطوات اللي ممكن ناخدها عشان نبطل نقول علي السرطان “المرض الوحش”؟

الأول جزء مجتمعي، احنا محتاجين نعلي الوعي ب انه المرض نفسه مبقاش زي زمان وانه بقي فيه علاجات بتسهل

together we cancer الحياة اكتر، ولازم يكون في مجتمعات تانيه كتير زي

 وناس كتير تتكلم وتعبر وتشارك تجربتها، والإعلام  طبعا محتاج يغير من المسلسلات والأعلانات اللي بتطلع مريض السرطان حزين وبائس

والتاني جزء فردي، وهو ان الشخص يحط نفسه في مجتمع شبهه يقدروا يدعموا بعض

والتالت والأهم جزء روحاني، وهو اننا ندعي ربنا يرزقنا الحكمة والبصيرة عشان نقدر نستوعب ونتحمل الأزمة لحد ما تعدي

ازاي ممكن حد يقدم دعم لصديق او فرد من العيلة عنده سرطان؟

لازم يخلوا بالهم جدا من اللي بيقولوه، يعني مثلا بلاش نقول “معلش” او “انتي قوية”  لو جم يشاركوا حاجة، لأنه اوقات الواحد بيبقي محتاج يكون ضعيف، لو هو حاسس بضعف وفي عز ضعفه لازم اقوله طبيعي اللي انت حاسه و أأكد شعوره، وامشي مع الموجة بتاعة الشخص وطاقته لحد ما يكون احسن، مجرد بس تكون معاه

ازاي بتاخدي بالك من صحتك النفسية؟

انا علي طول بتواصل مع دكتورتي النفسية، لأني بقدم مساعدة ودعم للناس فا دا بيسبب ساعات بيبقي عندي مشاعر محتاجة اطلعها، وبنصح كل الناس انها تعمل دا لأنه فعلا بيفرق

وبحب اقعد في الجناين المفتوحة وبقرا كتير وبكتب فا بعرف اعبر عن مشاعري، وبعبر عن مشاعري لصحابي واهلي وهم  بيدعموني جداً ولما بحس اني تعبانه بقول اني محتاجة ارتاح و باخد وقت لنفسي عشان اعرف ارجع ادي تاني

نصيحة من القلب لكل حد بيمر بموقف صعب

اول حاجة اننا نعيش الحياة يوم بيومه طول ماحنا معانا النهاردة لأننا مش عارفين ومش هنعرف بكرة في ايه حلو او وحش، وكتر التفكير فيه هيعجزنا، والحاجة التانية يكون عندنا يقين ان كل حاجة بتعدي مهما طولت