Sara Seif – Inspiring Women Series

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

سارة سيف، مدربة تربية إيجابية وعلاقات زوجية وتعافي من الإدمان. تقوم بتقديم العديد من الخدمات لمساعدة الأمهات و الأزواج لإدارة حياتهم بشكل صحي

قوليلنا ايه بظبط الفرق بين التدريب والعلاج النفسي عشان ناس كتير بتتلخبط بين الاتنين؟

المدرب بيساعد الشخص لما بيكون مش راضي أو سعيد بحياته انه يوصل للي هو عايزة لكن اللي بيروح لطبيب نفسي هو حد حياته متعطلة وعايز يرجع مسار حياته تاني. والمدرب شغله بيكون علي الخطة المستقبلية “هيعمل ايه”، لكن الطبيب النفسي بيشتغل أكتر علي الماضي والحاجات اللي حصلت زمان وأثرت في الشخص. الدكتور بيشخص وبيدي نصايح لكن المدرب مش من حقه يدي نصايح، هو بيشوف الشخص عايز يوصل لأيه وبيشتغل معاه علي دا علي حسب خطه بيعملوها سوا

ازاي بتحمي نفسك من انك تتأثري بكم المشاكل اللي بتتحكيلك.. ازاي بتعرفي تفصلي؟

أنا اللي ممكن يتعبني هو الأرهاق وضغط الشغل، لكن مش أن حد بيحكيلي مشاكلة، لأني بفكر نفسي دايماً إني مش منقذه، أنا بس بحاول أساعد، لأن في الأخر دا الشغف بتاعي فا أنا اللي بيتعبني ممكن يبقي تعب جسدي أكتر ما هو نفسي. اللي ممكن أحتاج اعمله هو أن لما بيكون عندي مشاكل شخصية بوقف شويه وأشتغل علي نفسي لحد ما ذهني يكون صافي وأرجع تاني أكمل

عرفنا أنك بتعملي تدريب للعلاج من الإدمان.. حابين أنك تكلمينا اكتر عن فكرة الإدمان لأن الناس بيجي في بالها نوع معين.. قوليلنا ازاي الشخص ممكن يحمي نفسه من إدمان اي شئ؟

الأدمان هو التعلق، الواحد بيتعلق بحاجة بتأذيه بس مش عارف يبطلها.. واحده مثلا بتحب الحلويات جدا وجالها سكر وبرغم تعبها دا هي مش قادرة تبطل، أو واحده في علاقة مع واحد بيأذيها جدا ومش قادرة تسيبه، حد متعلق جدا بالشغل لدرجة أنه واخد كل حياته.. كل دي أنواع إدمان

طبعاً بجانب الأنواع التانية المعروفة زي إدمان المخدرات.. وعموماً أنا مش بحس أننا نسميها “نحمي نفسنا” لأن دا في حد ذاته ممكن يقلقنا لو أحنا هنفكر فيها كده.. خلينا نقول أحسن “أزاي أخلي حياتي متوازنة أكتر” لأن في الأخر كل حاجة في حياتنا شهوات، الفلوس والجواز والشغل والأكل.. فا أول حاجة نعملها هو أننا نتقبل الضعف اللي جوانا تجاه الحاجات دي. ومش بيهذب الشهوات قد علاقتنا بربنا، وتهذيب النفس بالعبادات الكتير زي الصوم وصلاة النوافل أو نروح نتطوع في عمل خير

كل دا بيقوي عندنا الإرادة فا لما بنيجي في جوانب تانية في حياتنا بنكون عارفين أكتر أننا نعمل توازن صح. ولازم الواحد دايماً يكون رحيم مع نفسه مينفعش يكون في جلد ذات عشان دا بيأذي ومش بيحل حاجة، لأن النفس بتحس أنك بتقللي منها وأنها أضعف من أنها تعمل الصح. نشتغل علي حل المشكلة وايه اللي بيخلينا نكرر الفعل مرة تانية ونحاول نتجنب الحاجات دي بأننا نشغل نفسنا عنها. ومعني مهم جدا هو اننا بنحاول “ندير” الأحتياجات مش  “نتحكم” فيها لأننا لازم نكون فاهمين اننا اضعف من أن احنا نسيطر

بالنسبة لإدارة العلاقات.. ايه اكتر نصايح مهمه بتقوليها دايماً لأي اتنين مخطوبين أو متجوزين؟

مهم أوي يشتغلوا سوا علي الصداقة بينهم، وعشان يحصل صداقة كويسة لازم أكون فاهمة اللي قدامي ومعنديش سوء ظن فيه، يعرفوا أكتر عن كل حد فيهم بيحب ايه وايه اكتر حاجة بتبسطه، أنهي أكتر وقت بيكون رايق فيه، ومهم جداً يكونوا متفهمين لإنسانيتهم وأن هما الأتنين بني آدمين هيقصروا وهيغلطوا وهيحصل إهمال بس المهم هنتعامل مع دا ازاي.. يفهموا مع بعض لما يهدوا.. ايه مثلا سبب المشاكل دي ويحلوها بهدوء سوا. مينفعش يكون في أبيض وأسود في العلاقات لازم يكون في مرونة، وأهم حاجة كمان يبقي في تقبل لنفسي ولشريك حياتي. ويفهموا ان مفيش مثاليه في العلاقات، الدنيا مش هتمشي بالظبط زي ماحنا عايزين بس يفهموا سوا حدود كل واحد ويحاولوا دايماً ميتخطوهاش

وبيفرق جدا انهم يعملوا مع بعض حاجات مختلفة ومجنونة تهون ضغط الحياة، جزء الأنبساط دا مهم جداً. والحاجة المهمة بردو أنهم يقعدوا يكتبوا سوا كل المسؤوليات اللي بتتعمل في البيت ويبدأوا يقسموها علي  بعض علي حسب كل واحد بيحب ايه اكتر وهيلاقوا ان في حاجات بتتبقي في النص هما الأتنين مش بيحبوها دي كل واحد منهم ياخدها مرة كل شهر. دا مهم عشان كل واحد منهم بيكون شايف مجهود التاني في اللي بيعمله

ولو في وقت لقوا نفسهم قفلوا من بعض يبدأوا يعملوا حاجة أسمها تدريب الأمتنان يعني مثلا لو حد شايف التاني طيب، يكتب هو طيب ليه؟ ايه المواقف او الحاجات اللي بتبين دا ويكتبوها بالتفصيل. مياخدوش الحاجة الصغيرة أو الصفة الكويسة اللي في شريكهم انها حاجة عادية أو مش كبيرة ،لأ يحللوها ويشوفوا تأثيرها ايه في حياتهم. دا بيساعد الواحد انه يكمل لو حس في النص انه تعب. وبردو مهم أن الواحد يعرف الفرق بين انه يعمل وقفه او يعمل مشكلة.. الوقفه بتكون بهدوء بس المشكلة بتكون فيها طريقة بتطلع من اللي قدامي رد فعل مش حلو وبيضيع حقي

لو حد بيواجه ألم في حياته.. ازاي يحتوي مشاعرة صح ويسمح بوجودها منغير ما تشل حركة حياته؟

ببساطة، أقعدي في مكانك متعمليش أي حاجة لحد ما يروح لوحده، يعني أشارك نفسي مشاعري، وبعد ما اهدا ادور علي انا مضايقة من ايه، واوقات بيكون مفيش سبب ودا عادي جداً.. المهم بقي يكون عندنا حاجة بنعملها لما نحس كدا، ممكن حد يخرج، حد تاني يكلم حد يفضفضله فا يرتاح وممكن حد ينام ويصحي أحسن.. المهم يكون في حاجة بنعملها عارفين أنها بتريحنا في الوقت دا. أكون بدعم نفسي وكاتبة هدعم نفسي ازاي عشان وقت المشكلة أكون فاكرة

الشخص اللي عنده تفكير زايد.. ازاي يتجنب الإرهاق دا ويسيطر علي أفكاره؟

ورقة وقلم ويطلع كل الأفكار دي ويبدأ يفنطهم. هيشوف ايه الحاجات اللي ممكن يتصرف فيها وايه الحاجات اللي في أيد ربنا ويتوكل فيها. لأن التفكير الزيادة دا بيكون بسبب أن مفيش مرونة وعايزين نتحكم في كل حاجة فا نتعلم نسيبها علي ربنا وميكونش في حته التحكم دي ونتقبل دا

تقولي ايه للأمهات اللي بتحس دايماً بتقصير شديد ناحية ولادها بيوصل لأذي نفسي ليها.. ازاي تتقبل فكرة ان غلطها مش معناه انها ام وحشه؟

الفكرة دي ملهاش علاقة بالأمومة علي قد ما هي في حياتها بتقييم نفسها ازاي، هتلاقي ان عندها انتقاد شديد وأحكام قاسيه علي نفسها. فا بنحل دا بأنها تكون رحيمة اكتر مع نفسها ومع غلطها. وبعدين تسأل نفسها دا حصل ازاي مثلا، لأن دايما بيكون في أسباب وبيكون ليها حلول

أمهات كتير بتلاقي صعوبة في أنهم يكون ليهم وقت لنفسهم.. تنصحيهم بأيه وازاي قدرتي تعملي دا في حياتك؟

المشكلة الأساسية للموضوع دا أن بيكون مفيش تنظيم للوقت، مش فكرة أن مفيش وقت.. فا محتاجة أنها تقعد تظبط يومها وتشوف إيه الأوقات اللي ممكن تاخد فيها وقت، زي مثلا لما أولادها يكونوا بيلعبوا أو نايميين وأكتب الأوقات دي كلها وأعمل فيها خطة، مثلا تطلب من جوزها أنه يقعد مع الأولاد وتنزل تعمل حاجة مع صحابها

تقولي ايه البنات اللي عندها أحلام وأهداف ونفسها تحققها.. ايه اكتر حاجة ساعدتك في رحلتك؟

بختار متخصصين يدعموني في الحاجة اللي نفسي أوصلها لإن دي حاجة مهمة جداً، وحاولت اني أخلي الأهداف دي بيني وبين نفسي عشان اللي حوليا ميحطوش عليا اي ضغط في توقيت وصولي ليها او لو حتي موصلتلهاش متعرضش لأي لوم.. ومهم أنك متبقيش قلبك اوي انتي هتوصلي لأيه، طول مانتي بتعملي حاجة مفيدة وبترضي ربنا، ستمتعي بالوقت دا وربنا هيدلك علي الطريق