IWS Interview – Sarah ElZahaby

Inspiring Women Series are to showcase some of the successful modest women out there, who succeed not inspite of their hijab but because of it.

تهدف مجموعة النساء الملهمة إلى تسليط الضوء علي بعض النساء المحجبات الناجحات ، اللاتي لا ينجحن رغم حجابهن ولكن بسببه

---

سارة الذهبي، 34 سنه، أم لطفلين، صيدلانية وكاتبة في يوميات الأخبار. وقامت بكتابة ٣ كتب اجتماعية ساخرة “فيها حاجة حرشة – خلطة عمري – وش القفص”. تصدروا رفوف الأكثر مبيعاً لمدة ٤ سنوات منذ الإصدار ، وتم توزيعهم في بلاد عربية وأجنبية مختلفة. اتجهت منذ عام لصناعة المحتوي وحققت ملايين المشاهدات

---

قوليلنا إيه خلاكي تسيبي صيدلة وتبدأي في مجال الكتابة؟

انا مسبتش صيدلة، دايماً كنت بعمل الأتنين مع بعض بس السنة دي وقفت شوية لأني كنت عايشة برا ولسه جاية مصر فدلوقتي مركزه أكتر مع أولادي، و لأني بزهق جدا من وقفة الصيدلية فشغلي دايماً في شركات بشتغل في جزء التغذية وكده ودا صعب دلوقتي مع ظروفي

أزاي بتوفقي بين وقتك لنفسك وشغلك وبين البيت والأولاد؟ أمهات كتير بتحاول بس مش بتعرف تعمل ده

أنتي بتدوري علي الشغف بتاعك، لو حاجة انتي بتحبيها اوي مش هتاخد منك مجهود وانتي بتعمليها، ربنا رزقنا كلنا بمواهب مختلفة مهم جداً نركز مع نفسنا عشان نعرفها

و بحاول بردو أختار الأوقات اللي ولادي بيكونوا في المدرسة فيها او لما يرجعوا ويناموا وبنجز في الوقت دا كله حاجة، وأصلا الستات بطبعهم بيعرفوا يعملوا كذا حاجة في وقت واحد. فأنا بشوف إن لو هي حست انها مش عارفه توفق يبقي الحاجة دي مش الشغف بتاعها أصلاً و ممكن تبدأ تستكشف نفسها في حاجات تانية لأنها لما تحب حاجة جداً هتعرف تخلقلها وقت وتنجز فيها

ومهم بردو ان الأم تعود ولادها لما يكون في حاجة هتعملها لنفسها إن محدش مثلا يدخل عليها، وإنها لما تخلص هتجيلهم، وتكون من قبلها مظبطة ليهم كل حاجة ممكن يحتاجوها، وهما بالوقت فعلا بيفهموا

أنتي تقريباً بدأتي مشوارك من 6 سنين صح؟ إيه سر أستمرار نجاحك؟

أول حاجة الأستمرارية، لازم تقدمي محتوى يومي، ويكون في طولة بال شويه. وبجد الحاجة لو حلوة وفي استمرار عليها هتتعرف كده كده، واختيار الوقت اللي هيتكتب فيه المواضيع مهم جداً، في أوقات مواضيع بيكون ليها مواسم معينه و دي بتوصل اوي للناس لما بيتكتب فيها. وبيفرق جدا للناس انهم يلاقوا حد يحس بيهم و دي من أكتر الحاجات اللي فرقت في علاقتي بالناس اللي بتابعني وساعدت علي استمرار نجاحي.

والناس محتاجين يفكروا برا الصندوق في موضوع “المحتوي”. للاسف كله بقي بيفكر أنا يا إما هكون blogger  أو youtuber،

مع إن في حاجات تانية أكتر من كده بكتير ممكن يستغلوها بكذا طريقة، في ناس هوايتها ترتيب البيت أو الطبخ، أو واحدة عندها طولة بال جدا مع الاولاد، دي حاجات كلها لو إتنمت ، هتحقق فيها نجاح كبير.

لازم كل ست يكون عندها إيمان بنفسها، ولما تحقق دا هتلاقي كل حاجة بتتيسر لها وناس كتير حتي لو مش عارفينها هيؤمنوا بيها

ازاي بتخافظي علي أن الناس متفهمش حاجة غلط او تضايق من حاجة في الفديوهات اللكوميدي اللي بتقدميها؟

الحاجة اللي بقلق منها أنا شخصياً أو بحس انها شائكة شوية مش بجازف بأني أنزلها، وطبعاً باخد بالي ان الكلام ميكونش فيه اي هزار يتفهم انه تريقه مثلاً

هل واجهتي أي صعوبات من أول ما بدأتي بسبب الحجاب او بسبب تحديات واجهتيها عموماً؟

واجهت تحديات كتير من أول ما بدأت، أولا لأن الدعم من الناس حواليا مكنش كتير، وتعرضت لتريقة لما قولت اني عايزة اعمل كتاب، فا أكبر صعوبة واجهتني هي الإحباط. واتغلبت علي ده بأني اخدت قرار بيني وبين نفسي اني هعمل اللي انا حباه بغض النظر في دعم وتشجيع ولا لأ

وبالنسبة للحجاب فهو عائق شويه إني أقدم برامج في التلفزيون مثلا، و في ناس فعلاً طلبوا مني وقالولي لو قلعتي الحجاب تاني يوم هنجببلك عرض برنامج ورفضت دا وكانت نيتي اني مش عايزة أعمل حاجة تغضب ربنا وكان عندي يقين انه هيعوضني و فعلا عوضني بحاجات كتير الحمد لله

إنتي لحد دلوقتي كتبتي ٣ كتب.. إيه أكتر حاجات بتلهمك للكتابة؟

أولادي ليهم دور كبير جداً، اي حاجة ليها علاقة بالمدرسة والتربية. وبردو بيلهمني جدا قصص االلي حواليا او مواقف عامة بشوفها قدامي أو بتعرض لها كل يوم

ممكن تقوليلنا نبذه عن كل كتاب كتبتيه؟

التلاته من النوع الأجتماعي الساخر ومكتوب بالعامية. أول كتاب “فيها حاجة حرشة” كوميدي جداً، وتاني واحد “خلطة عمري” دا المختلف في إنه فيه مواضيع إجتماعية بس مش بتضحك وبردو في جانب كوميدي، وآخر واحد “وش القفص” دا الكوميديا فيه قليلة جداً، بس أكتر واحد اجتماعي فيهم. فحبيت ان يكون 3 كتب كل واحد فيهم مختلف عشان يناسب ذوق كل حد

لو أي بنت أو ست عندها حلم ونفسها توصله، تنصحيها بإيه؟

محتاجة انها تصبر وتشجع نفسها، ومتقارنش مشوارها بمشوار أي حد تاني. ويكون عندها مرونة أنها لو سعت ورا هدف وحست في النص ان مش دا اللي هي عيزاه، عادي تسيبه وتدور علي حاجة تحبها أكتر. اوقات كتير بنحتاج ناخد خطوة لورا عشان نطلع لقدام

ولازم كل ست تحب نفسها، لو حبت نفسها بجد هتوصل للي هي عيزاه في حياتها لأنها هتبقي عايزه تاخد بالها من تفاصيلها الشخصية زي ما بتركز مع تفاصيل الناس اللي بتحبهم حواليها، بالذات الستات المتجوزة، مهم نركز مع البيت واولادنا وشريك حياتنا بس لازم نشحن طاقتنا بأننا نبقي برضو مركزين مع نفسنا عشان ميجريش بينا الوقت ونندم لما منلاقيش إننا عملنا حاجة خاصة بينا